Atualità
Dac söl turism, Kompatscher: „Al é n pilaster fondamental dl’economia“
Le presidënt Kompatscher sodesfat di dac söl turism da d’isté publicá dal ASTAT. “Le turism de cualité é n pilaster de nosta economia.”
Les zifres tl setur dl turism aumentëia ince tl 2017, por ejëmpl por ci che reverda les presënzes él sté n aumënt dl 3,5 porcënt. I dac publicá incö dal Istitut provinzial de statistica ASTAT söl turism da d’isté tl 2017 confermëia por le presidënt dla Provinzia Arno Kompatscher che “le rode dl turism vëgn renforzé al intern dl sistem economich dl Südtirol.´”. Dai dac pón lí fora n valgügn aspec interessanc: da öna na pert na chersciüda tl setur di hotí da 4 y 5 stëres, cun n indesc de adoranza di posć da dormí che arjunj cinamai le 76,1 porcënt y le 84,2 porcënt. La pert plü grana cun plü de 7 miliuns de pernotamënc vëgn indere registrada tl setur di eserzizi a 3 stëres che á n indesc de adoranza dl 56,9 porcënt.
“N aspet che fej plajëi é ince che i eserzizi aldinfora di hotí á de bugn dac, sciöche por ejëmpl i agriturisms, a desmostraziun dla gran varieté dl’oferta presënta söl teritore.” Te chësc setur che reverda les vacanzes di lüc da paur y ti apartamënc vëgnel registré la sojornanza media plü alta y che é danter i 6 y i 7 dis. “Al se trata de n aspet, a chël che i ti ciarun cun n atenziun particolara, deache sojornanzes plü cörtes porta ince para n aumënt dl trafich. Le trend vá tl vers de na sojornanza plü cörta, ince sce tl 2017 é le valur mesan romagnü anfat (4,6 nöts), mo i messun ciaré da afronté chësta tematica tolon ince ite i aspec dla natöra y dla contrada”, insciö Kompatscher.
Kompatscher fej ince referimënt al stüde publiché inier tres dal ASTAT sön l’export: „Por le secundo ann indolater é la balanza dl comerz positiva, cun les esportaziuns che é plü altes dles importaziuns. Sciöche i dac dl tursim é ince chësc n dat de importanza fondamentala por nosc teritore.”
USP
