Atualità

Violënza cuntra les ëres:n video y na campagna por sensibilisé

Öna n'ëra sön trëi mëss sté fora violënza. Al é gnü presenté n video che inviëia a denunzié y al vëgn indô invié ia la campagna "post ocupé" y le lac blanch.

Scomenciadia "Post resservé": N scagn cöce en rapresentanza de vigni ëra copada dala violënza, le scagn resta öt. (Foto: USP/rm)

Imprömadedöt i dac che stlarësc le fenomen dla violënza sön les ëres: öna n'ëra sön trëi mëss sté fora violënza sessuala o fisica almanco un n iade tratan süa vita. Te dui omizig sön trëi che vëgn dant te relaziuns é les vitimes ëres. Tla Talia él gnü copé dal 2005 incá indöt 1377 ëres, chël ti corespogn presciapüch a 115 ëres al ann. "Cun d'atres parores - á dit l'assessuria Martha Stocker ai 15 de novëmber tratan la conferënza stampa de presentaziun dles scomenciadies en ocajiun dl De internazional cuntra la violënza sön les ëres che vëgn tigní en sabeda, ai 25 de novëmber - vigni trëi dis vëgnel copé n'ëra tla Talia. Chisc numeri dess se fá ponsé sura: cun dötes les imajes de violënza y abus che i odun vigni de se desmentiunse sovënz che la maiú pert dla violënza vëgn dant te ciasa. N laur de valüta de chësc vers vëgn fat dales Ciases dles ëres. Dl 2016 s'á 562 ëres adressé ai Zëntri de consulënza cuntra la violënza dla provinzia."

Video cuntra la violënza sön les ëres

Deboriada cun le regist Mauro Manzo á l'assessuria spo presenté n video por sensibilisé sön le tema dla violënza sön les ëres. Chësc sará da odëi tles edemes che vëgn ti cinema, tla televijiun y ti portai online. "Se tó l'edl é uman y da capí" á dit le regist tratan la conferënza stampa, mo al á invié a mostré la violënza. Da öna na pert resta i abusc ascognüs deache ai vëgn a se le dé danter i mürs de ciasa, dal'atra pert deache dlungia les vitimes él ince i testemoni che á tëma da denunzié ci che ai á odü. Le spot é gnü finanzié tl cheder dla medejina de gënder dal Ofize Ordinamënt sanitar. Ala fin dl video cört cuntra la violënza sön les ëres, desponibl ince sön le canal Youtube dla Provinzia, vëgnel dé dant le numer nazional cuntra la violënza y le stalking 1522, che funzionëia 24 ores sön 24.

Al vëgn indô metü a jí la campagna "post ocupé" y le lac blanch

La presidënta dla Comisciun por l'avalianza d'oportunités Ulrike Oberhammer á alzé fora che "i testemoni á le dovëi da denunzié i abusc y i ac de violënza". Ti ultims trëi agn é le numer di omizig de ëres indô aumenté dassënn, al é gnü copé mesanamënter 150 ëres vigni ann. Spo ára presenté la scomenciadia "Post ocupé" inviada ia dl 2013 a chëra che i Comuns dl Südtirol tol pert. Tl cheder dla scomenciadia vëgnel lascé n post lëde a teater, te bus y a scora por daidé recordé chës ëres che ess podü le tó ite sce ares ne foss nia stades vitimes de n omizid. Oberhammer á invié dötes les istituziuns publiches da tó pert a chësta aziun "por alzé fora che le feminizid reverda dötes les ëres". La scomenciadia sará ince tl zënter dla proscima ediziun dla revista feminina "ëres - frauen info donne". Ala fin dla conferënza stampa él gnü recordé la campagna di lac blanc che á da nen fá cun le tema dla violënza sön les ëres. Sciöche vigni ann ti vëgn chisc lac mená a ëi importanc che tol dezijiuns a livel provinzial. Che che se vista n te lac dai 25 de novëmber cina ai 10 de dezëmber mostra publicamënter che al sostëgn chësta campagna y che al é cuntra la violënza sön les ëres.

 

USP

Galaria dales fotografies