Atualità
562 ëres á chirí proteziun cuntra violënza tl 2016 te Südtirol
La situaziun dla violënza dles ëres tl’Euregio é stada tl zënter dl pröm convëgn dl’Euregio dediché a chësta problematica.
La violënza cuntra les ëres ne conësc nia eté, o le corú dla pel y la posiziun soziala. Les statistiches desmostra che dai 12 ai 15 porcënt dles ëres t’Europa subësc vigni de violënza te ciasa. Tratan le pröm convëgn dl’Euregio sön la tematica „Deboriada: cuntra la violënza ales ëres” él gnü a se le dé de plü discusciuns da pert de esperc de döta l’Euregio sön chësta problematica y sön mosöres de proteziun dles ëres.
“Tl Südtirol él sté tl 2016 indöt 562 ëres che á chirí proteziun te strotöres de consulënza. Indöt 97 ëres é gnüdes tutes sö te strotöres de proteziun”, á dit Petra Frei, la direturia dl Ofize Sconanza di Jogn y intlujiun soziala. Dötadöm vëgn dötaurela sostigní le sorvisc dles strotöres de proteziun cun 1,85 miliuns de euro y che reverda indöt 4 ofizi de consulënza y 25 posć te strotöres de proteziun y 12 posć te abitaziuns aposta. La colaboradëssa Alessia Brunetti á presenté de plü proiec che vëgn organisades en gaujiun dla tematica “Violënza cuntra les ëres”, danter l’ater n codejel cun mosöres d’intervënt che é gnü realisé en colaboraziun cun les forzes dl ordin. Implü gnarál publiché na Infocard cun informaziuns sön les ciases de proteziun y al é ince sön le program na campagna de sensibilisaziun adm cun les Intendënzes scolastiches.
“Por ci che reverda ëres vitimes de violënza é les zifres tl Trentin söporjö medemes co tl Südtirol” á dit Laura Castegnaro dla Repartiziun Politiches soziales dla Provinzia dl Trentin. Öna dles fondamëntes por smendrí chësc fenomen é la costruziun de na rëi de colaboraziun danter les istituziuns desvalies sön la basa dla convenziun de Istanbul. Anna Lazzeri á spo presenté la scomenciadia “cambia-menti” che é ponsada dantadöt por ëi che é gonot gaujia dla violënza.
“La violënza reverda deplü i ëi co les ëres, sides sciöche gaujia mo ince sciöche vitima de violënza” á dit Elisabeth Stögerer-Schwarz, direturia dl Ciamp de competënza sön l’avalianza dles poscibilités dl Land Tirol. “mo canche ara nen vá de violënza sessuala spo él 9 de 10 vitimes ëers”. Tl Tirol él gnü aconsié te zëntri de proteziun cuntra la violënza tl 2015 indöt 1.051 porsones, de chisc 905 ëres y 146 ëi. Reac de violënza sessuala vëgn fac 68 porcënt te contest de familia y de conescënc. Tl Tirol él indöt 125 posć te abitaziuns de proteziun aposta, de chisc 32 posć por mitans y mituns.
Tratan le danmisdé él spo gnü organisé de plü mëses de laur sön le reinserimënt tl monn dl laur de ëres che é stades vitimes de violënza, sön aiüc de jogn y jones che á viüt violënza y sön le laur de colaboraziun por renforzé i sorvisc por les ëres. Debatü él ince gnü sön i malfaturs y sön le laur cun les ëres migrantes tles ciases de proteziun.
Video cun imajenes dl convëgn „Deboriada: cuntra la violënza ales ëres”
Video de segnalaziun dla tematica
USP
Galaria dales fotografies
