Atualità
Numer unich d’emergënza, da incö é le 112 atif te döt Südtirol
Da incö (17 d'otober) él atif tl Südtirol le numer unich europeich d’emergënza 112. Al sostituësc düc i numeri atifs cina sëgn, le 118, 115 y 113.
“N gran vare de cualité por le sorvisc ala popolaziun y n’arjunta dl’autonomia”: chëstes é les parores dl presidënt dla Provinzia, Arno Kompatscher, che á simbolicamënter dé incö ai 17 d'otober a Balsan le start ofizial al numer unich europeich d’emergënza 112. “Le Südtirol y le Trentin, é stá bugn da fá pié ia chësc proiet ince por mirit de na normativa ad hoc che ti conzed ales Provinzies da manajé y organisé le sorvisc te na manira autonoma”, insciö Kompatscher. La buna colaboraziun danter les döes Provinzies é ince gnüda sotrissada dala presënza dl assessur trentin Tiziano Mellarini y dl’assessuria por la sanité Martha Stocker y l’assessur por la proteziun zivila Arnold Schuler. Le commissar dl govern, Vito Cusumano, á implü sotligné “la sinergia danter i sorvisc desvalis che sará atifs por mirit dl numer unich d’emergënza 112” y á rengrazié dötes les organisaziuns interessades: i Carabinieri, la Polizia, la Crusc Blancia, la Crusc cöcena, i Stödafüch (corp permanënt y volontars), le socurs alpin y chël sot ega.
La zentrala d’emergënza unica nöia
Le numer unich d’emergënza 112 sará atif 24 ores sön 24, 365 dis al ann. Le numer d’emergënza 112 podará ince gní devié debann da un n operadú telefonich al ater canche la rëi ne é nia curida. Te na pröma fasa gnará les telefonades ai numeri 118, 115, 113 y 112 deviades diretamënter ala zentrala unica. Do na pröma fasa sarál spo ma plü atif le numer unich europeich d’emergënza 112. La zentrala á süa sënta tla tor dla Proteziun zivila de via Druso 116 a Balsan. Por mirit dla localisaziun automatica di dac sarál poscibl da inrescí la provegnënza dles telefonades en entrada. La localisaziun é ince garantida tres la app Where ARE U che mëna inant automaticamënter la posiziun GPS dles porsones.
Colaboraziun danter Balsan y Trënt
Öna dles novités é ince la colaboraziun plü strënta danter les sëntes destacades de Balsan y Trënt che é coliades ala Zentrala unica d’emergënza, che ti caji cuotidians funzionará te na manira autonoma. Ma te caji d’ezeziun, por ejëmpl por gaujia de dagns ala zentrala o n numer massa alt de telefonades, podará les zentrales se daidé öna cun l’atra.
I numeri dla Proteziun zivila
La Zentrala provinziala d’emergënza che respogn al numer 118 é ativa dal novëmber dl 1993 incá y dal 2003 incá gestësc la zentrala les telefonades ai numeri d’emergënza 115 y 118 che reverda domandes de socurs sanitar, di stödafüch, dl socurs alpin y de chël sot ega. La rëi d’organisaziuns interessades é dër ampla: 306 é les uniuns de stödafüch volontars, 56 é les bases dl socurs alpin nazional y dles lies da munt y 37 é les seziuns locales dla Crusc blancia y cöcena. Implü röiel lapró la sënta dl corp permanënt di Stödafüch de Balsan. Dötadöm fejel pert de chësc sistem d’emergënza zirca 18mile porsones danter volontars y profescionisć. Dessot él poscibl da desćiarié intervistes y videos.
Video zentrala unica d'emergënza
Video presentaziun numer unich europeich 112
Audiointervistes Kompatscher, Schuler, Stocker, Walcher y Fop
USP
Galaria dales fotografies
