Atualità

Detlaraziuns dl’assessuria Stocker en cunt dla mort de Adan

L’assessuria Stocker, atocada dala mort dl pice Adan, á assiguré da stlarí le percurs dl fat sozedü. Le pröm contat cun la familia é sté ai 2 d’otober.

L’assessuria por les politiches soziales Martha Stocker á traté tratan la conferënza stampa da incö la situaziun y le percurs che á porté ala tragedia de Adan H., n möt de 13 agn curd-irachen, che patî de distrofia muscolara y che é mort tl ospedal da Balsan tla nöt danter i 7 y i 8 d’otober.

“Dantadöt oressi ti fá ala familia les condolianzes da pert de döta la Junta provinziala por la mort dl pice Adan che nes á atoché te na manira dolorosa düc canc”, á afermé l’assessuria Stocker. “Danter inier y incö unse coiü adöm informaziuns da düc i ofizi dla Provinzia, dal Comun de Balsan y dales organisaziuns de volontariat por analisé avisa le percurs dai 2 de otober inant, data te chëra che al é gnü a se le dé le pröm contat cun la familia H. a Balsan. I ves recordi che sön la basa dles informaziuns coiüdes adöm ne á Adan y süa familia mai messü dormí alaleria dai 2 de otober inant”, á ajunté Stocker.

La familia é rovada, aladô dles informaziuns coiüdes adöm, a Balsan en domënia al 1. de otober dala Svezia, olache ara ê rovada tl 2015 y â sojorné cina dan da püch. Do da dui agn â la Svezia refodé la domada do asil dla familia che â insciö tut la dezijiun da lascé la Svezia denant co messëi jí zoruch tl Iraq sciöche preodü do la refodada dla domanda do asil.

En lönesc ai 2 d’otober â la familia H. contaté le SIS (Sorvisc de inclujiun soziala dl’Aziënda sanitara de Balsan) che ti â comuniché ala familia che al ne ê nia poscibl da ti dé alberch ala familia te na strotöra o te n hotel. Le medemo gnô Adan recoveré te ospedal a Balsan por problems da trá le fle y d’atri dolurs. Döta la familia á dormí spo la nöt te ospedal.

La uma y le möt amaré é restá te ospedal ince en mertesc ai 3 d’otober, l’atra pert dla familia á passé la nöt te na sistemaziun organisada da privac. Adan é romagnü te ospedal cun la uma cina en mercui ai 4 d’otober canche al é gnü  fat na “dimisciun de sconanza” y al é gnü socodí por dui dis, dai 4 ai 6 d’otober, da “SOS Bozen” cun la familia che sojornëia tl Hotel Adria.

En vëndres é la familia jüda te Cuestöra de Balsan por formalisé la domanda do asil y propi te chisc momënc él sozedü ince l’inzidënt cun le scagn da rodes. Le jon é gnü recoveré tl ospedal da Balsan y operé. Al é gnü a se le dé n’infeziun y Adan é mort tragicamënter tratan la nöt danter i 7 y i 8 de otober.


Ala fin de süa tuta de posiziun á l’assessuria Stocker sotrissé che la zircolara dla Provinzia che reverda les desposiziuns d’acoliënza prevëiga ti caji cun porsones che fej pert de “categories vulnerables” che an pó ciafé n colocamënt por na perioda de alplü 3 dis. Chësta poscibilité de colocamënt vel ince por porsones che vëgn da d’atri Stac o Regiuns europeiches, sciöche tl caje dla familia H.

Chësc caje á evidenzié la nezescité da mioré la comunicaziun danter les istituziuns publiches desvalies, les assoziaziuns de volontariat y le Stat, insciö Stocker.

En ajunta: la cronologia dl percurs dla familia H. tl Südtirol dai 2 de otober inant

 

USP