Atualità
Junta provinziala: Aprovada la norma söl atestat de trilinguism
Aprovaziun da pert dla Junta provinziala dl’avalianza dl percurs de stüdi tles scores ladines por ci che reverda la zertificaziun dl atestat de trilinguism.
Reconoscimënt prezius por la scora ladina y avalianza de titui de stüde por le patentin de trilinguism: la Junta provinziala á aprové incö ai 10 d’otober la deliberaziun che prevëiga le reconoscimënt dl atestat de trilinguism A che pó gní sëgn arjunt aladô dles medemes condiziuns sciöche ince por le bilinguism. Insciö sarál poscibl tl dagní da ciafé l’atestat de trilinguism A do la contlujiun daimpröma de na scora alta cun 10 agn de percurs scolatisch tles localités ladines y spo cun la contlujiun positiva de n percurs de stüdi universitars por talian o todësch. “Cun chësc vare vëgnel avalié i sistems de reconoscimënt dl patentin dl bilinguism y dl trilinguism por düc i grups linguistics dl Südtirol”, á dit le vizepresidënt dla Junta provinziala Christian Tommasini. Por le sistem scolastich ladin velél insciö les medemes condiziuns por ciafé i atestac de bi- y trilinguism anfac sön döt le teritore provinzial. “L’aprovaziun de chësta avalianza di titui de stüde ne é nia ma n reconoscimënt de gran valur por nosc sistem scolastich ladin y por düc chi che ne fej para, mo ince na sauridanza importanta por studënc y studëntes”, dij l’assessur por la scora ladina Florian Mussner.
La norma ê bele gnüda presentada dan da de plü agn sön scomenciadia dl presidënt dla Provinzia Arno Kompatscher y dl assessur Florian Mussner. La regolamentaziun nöia ê, denant co che ara é passada te Junta, contignüda te na norma d’atuaziun nöia dl Statut d’Autonomia che ê gnüda aprovada da pert dl Consëi di Ministri ai 24 de merz. Denant ê la norma passada tla Comisciun di Sis.
USP
