Atualità
Dolomites patrimone Unesco: terassa panoramica nueva te Gherdëina
L ie te Gherdëina che l unirà njinià ite la terassa panoramica nueva che conta dla Dolomites coche arpejon dla Unesco. La unirà metuda su sun Col Raiser, Mastlé
La segonda terassa panoramica ilustrativa dla Dolomites patrimone Unesco unirà fata tl chemun de Santa Crestina sun Col Raiser, Mastlé. L chemun meterà a despusizion i mesuns finanziei che ie debujën. Da pert dla Fundazion Dolomites Unesco iel preudù de ndut 31 terasses panoramiches sparpaniedes ora per i raions nteressei dl Südtirol, dl Trentin y tl Belunesc. 8 ie la lueges ndividuedes per chësc fin tl Südtirol. Cun la realisazion dla terasses panoramiches miren a slargë la cunescënzes sun la Dolomites y a valorisé dut l teritore dla Dolomites patrimone mundiel Unesco. “La terasses ie pensedes per splighé la carateristiches che fej dla Dolomites n raion tan particuler y de marueia y n uel dé n cuntribut mpurtant per si cumprenscion y cunescënza”, dij l assessëur provinziel per l ambient Richard Theiner. “Per les realisé àn cris ora lueges cun na bela ududa sun de plu pizes, che ie adatedes per la spligazion de carateristiches geologiche y geomorfologiches, y daujin a stazions a mont ulache l passa truepa persones”, tlarësc l assessëur.
La prima terassa ie unida realiseda sun l Strudelkopf/Monte Specie, tl parch naturel Fanes-Senes-Braies tl chemun de Toblach, cun n panorama sun la pizes dl Sést y de Braies, i Cadini y l Cristallo. La ie unida giaurida d’agost dl 2015. I lëures de realisaazion, coordinei dal Ufize parcs naturei dla Provinzia, fova unic dejëuc dal Ufize sistemazion di ruves da mont y peralevines; la Repartizion nfrastrutures se ova cruzià dla pert statica, la Repartizion servisc stredes dla culaudazion statica, y l Ufize geologia y proes de materiai dla valutazion dl raion de ntervënt. La terassa sun l Strudelkopf ie stata n proiet pilot per l’autra set terasses che unirà njiniedes ite te nosta provinzia. L prototip dla terassa panoramica fova unì svilupà dal architet David Messner deberieda cun si pere, l artist Franz Messner.
Col Raiser sun Mastlé te Gherdëina ie unì cris ora coche luegia per la segonda terassa panoramica sun la Dolomites patrimone Unesco tl Südtirol. L ambolt de Santa Crestina Moritz Demetz y la referënta cumenela Renate Senoner ie cuntënc y sotrissea che “tres chësta terassa panoramica saral mesun purté pro a ti purté plu daujin la cuntreda unica dla Dolomites ala populazion dla valeda y ai truep turisć”.
USP
