Atualità
De dl’Autonomia 2017, online la plata internet cun program
Ai 5 de setëmber, le De dl’Autonomia, sarál poscibl da vijité les sëntes prinzipales dl Consëi y dl’Aministraziun provinziala. Le tema zentral é la solidarieté.
Dan da püch éra jüda online, la plata internet ofiziala dedicada al De dl’autonomia cun dötes les informaziuns prinzipales sön le significat dla data de ai 5 de setëmber por Südtirol. Por l’aniversar vëgnel inann metü da jí n De dla Porta daverta cun tl zënter la tematica dla solidarieté.
Le Palaz Widmann y le Consëi provinzial sará daverc dales 10.00 ales 18.00 por düc i zitadins. Al gnará presenté les organisaziuns desvalies che laora tl ciamp dla solidarieté, dl volontariat y dla cooperaziun al svilup. ndöt tolarál pert söporjö 20 assoziaziuns che presentará na panoramica sön les ativités de volontariat, sön la cooperaziun al svilup y söi sorvisc soziai tla curt interna dl Palaz Widmann dales 10.00 inant. Sön la plata internet él da ciafé le program avisa y ince na descriziun cörta dles assoziaziuns che tól pert ala scomenciadia.
Sön la plata internet él ince elenché les tapes plü importantes dl’autonomia südtiroleja, dal’Acordanza de Paris passan al Pachet rovan ince ai tëmps atuai cun l’aniversar di 25 agn de apajamënt dl strit dan les Naziuns Unides. Implü él ince gnü metü da jí por l’ocajiun n quiz sön facebook, olache düc i interessá pó ejaminé sües conescënzes tles materies dla autonomia y solidarieté.
USP
