Atualità
De dla Scora Ladina 2017: Incuntada ai 31 d’agost
L’apuntamënt tradizional de daurida dl ann scolastich gnará a se le dé inann ai 31 d’agost dales 09.00 inant tl salf dles manifestaziuns a Corvara.
Sciöche bele da tradiziun organisëia vigni ann püc dis dan le mëteman dl ann scolastich nü le Departimënt Educaziun y Cultura ladina le De dla Scora Ladina. Chësc ann é la tematica prinzipala dl de le svilup dles competënzes di scolars y di jogn te na perioda temporala caraterisada da mudamënc soziai y sfidades costantes. Do les parores de salüd da pert dl assessur por la scora ladina Florian Mussner y l’intendënt ladin Roland Verra gnarál spo a se le dé dales 10.15 le referat por todësch de Margret Rasfeld dal titul “Aufbruch, Umbruch, Wandel. Was wirklich zählt: Beziehung, Wertschätzung, Verantwortung, Sinn”. Margret Ritsch é öna dles fondadësses dla scomenciadia “Schule im Aufbruch”. Do le referat él preodü na discusciun y tratan le domisdé spo l'aprofondimënt dla tematica y l’elaboraziun de strategies d’insegnamënt.
Le De dla Scora Ladina gnará a se le dé
en jöbia, ai 31 d'agost dl 2017,
dales 09.00 cina les 16.30
tl salf dles manifestaziuns “Franz A. Rottonara“
strada Colalt 36
a Corvara.
La moderaziun sará dl ispetur dles scores ladines Albert Videsott, dla cornisc musicala se fistidiará la Scora de Musiga dla Val Badia. Le De dla Scora Ladina vëgn reconesciü ai fins dl ajornamënt. L'invit cun le program é gnü injunté.
USP
