Atualità
Dala Junta: Frabiché alisiré, Metrobus, maturité plü cörta
Les dezijiuns plü importantes tutes dala Junta é l’aprovaziun de n dessëgn de lege nü, dl finanziamënt al Metrobus y dla maturité te cater agn.
La Junta provinziala á aprové incö le program trienal dl’Agenzia de suraverda söl frabiché abitatif alisiré. L’Agenzia, á recordé le vizepresidënt Christian Tommasini, mëss garantí la suraverda sön le respet dles prescriziuns dla tlausola soziala dl frabiché abitatif alisiré y, sön domanda di Comuns, söl respet dles prescriziuns dla tlausola dl convenzioné. Por ci che reverda la suraverda sön la tlausola soziala fajará l’Agenzia na convenziun nöia cun la Repartiziun Frabiché abitatif por podëi mët man cun l’ativité de control te chësc setur. L’Agenzia fajará n’ativité de control ex post sön les alisiraziuns economiches conzedüdes te un n ann (de almanco le 6 porcënt dles pratiches) valutan la legalité dla prozedöra de convenziun y les condiziuns che i anuzadus á dé jö por ciafé les alisiraziuns. Indöt gnarál controlé almanco 180 dles 3000 alisiraziuns conzedüdes. L’Agenzia garantësc ince le sorvisc de suraverda a bëgn di Comuns söl respet dles prescriziuns pro la tlausola söl frabiché convenzioné. I Comuns podará s’anuzé dla Agenzia por registré y contesté les contravenziuns ala tlausola söl frabiché convenzioné y podará ince fá straufunghes. Le budget a desposiziun dla Agenzia é por i proscims trëi agn de 1,1 miliuns de eruo, finanziá al 50 % dai Comuns.
Löm vërda dala Junta provinziala ince al dessëgn de lege provinziala cun les desposiziuns por ademplí ales oblianzes dla Provinzia en confrunt dl dërt europeich. Al se trata de na lege provinziala che rezepësc les normes europeiches tres chëra che la Provinzia podará atué les diretives de Bruxelles. Insciö gnarál adaté le ordinamënt iuridich ales novités di documënc europeics por avëi na lege organica cun dötes les desposiziuns provinziales che reverda le dërt europeich. Öna dles novités rezepides dala lege provinziala, sciöche splighé incö dal vizepresidënt Christian Tommasini, é por ejëmpl la poscibilité da finanzié de pici implanc portamunt ince te zones cun plü de n implant tla medema area (cina sëgn êl ma poscibl da finanzié te situaziuns de n implant unich). La Junta á insciö inserí la poscibilité de n finanziamënt de de pici implanc portamunt por na cuota cina le 45 % dl investimënt preodü. En general garantirá la lege provinziala europeica n cheder organich unich cun dötes les desposiziuns provinziales che reverda l’Uniun europeica. Le dessëgn de lege gnará sëgn mené inant al Consëi provinzial.
Implü á la Junta provinziala ince aprové le finanziamënt dl proiet por la trata nöia dl Metrobus danter la plaza Adriano y le punt Drusus tla cité de Balsan. Al é preodü n investimënt da pert dla Provinzia de 1,05 miliuns de euro, indöt gnarál investí 1,5 miliuns de euro. Le proiet é gnü planifiché y gnará atué dal Comun de Balsan y reverda ma na pert dl conzet de realisaziun dl Metrobus danter Balsan y Kaltern. La Junta provinziala á ince dé süa aprovaziun a na fasa de sperimentaziun tles scores altes da Balsan Istitut tecnich economich “Cesare Battisti” y lizeum linguistich Marcelline por ci che reverda la maturité te cater agn. Ala fin á la Junta provinziala ince nominé i organs dl'Agenzia por CiasaClima por i proscims cater agn. Ulirch Santa é gnü confermé diretur general, Ulrich Klammsteiner restaré le diretur tecnich y Lodovico Comploj é gnü nominé revisur di cunc. Andrea Gasparella dla Université de Balsan y Georg Pichler dl'Agenzia por l'ambiënt é gnüs designá por le comité de coordinamënt. Implü gnarál ciamó nominé trëi comëmbri da d'atres istituziuns.
USP
