Atualità
Kompatscher incunta le minister Kurz: migranc, Europa, autonomia
Colaboraziun por svilupé l’autonomia y le raport cun l’Europa, le plan UE söi muciadus: les tematiches dl’incuntada danter Kompatscher y le minister Kurz.
“I un albü ti ultims mëisc de plü ocajiuns ofiziales por recordé i 25 agn dal apajamënt dl strit y la storia de suzes dl’autonomia – cun chësc pinsier á le presidënt Arno Kompatscher metü man la conferënza stampa do l’incuntada a Balsan – y tratan l’incuntada a Viena dan da püch un fat fora da jí inant sön chësc percurs de colaboraziun y dialogh.” Kompatscher á recordé che “l’autonomia südtiroleja á la nezescité da se svilupé inant ince conscidran le mudamënt dl contest iuridich t’Europa y tla Talia. La colaboraziun cun l’Austria é preziosa ince porvia di contac cun i Ministers, ince por ci che reverda la recuperada de n valgönes competënzes do les sëntenzes dla Consulta.” Le minister por i afars cun l'Ester austriach Sebastian Kurz á dit de ester “imprescioné” dal percurs dl Südtirol, al á fat i complimënc por la chersciüda economica y i vari inant tl setur dl’autonomia (“n model de suzes mondial, canche al vëgn debatü de situaziuns de crisa te Paisc desvalis ti vëgnel ciaré gonot al ejëmpl dl Südtirol”). Por l’Austria resta le Südtirol “na tematica de importanza fondamentala, ince deache le guern local y le presidënt dla Provinzia é partner de gran crëta.” Tl’incuntada a Balsan danter Kompatscher y le Minister Kurz (che á ince les inciaries di raporc cun l’Europa) él gnü rajoné di programs de sostëgn UE, di fonds strotorai y dla macroregiun alpina EUSALP. Kurz á dit de ester contënt dla colaboraziun transfrontaliera portada inant dl’Euregio, “a bëgn de düc i raiuns interessá”.
Öna dles tematiches zentrales dla conferënza stampa é stada chëra di muciadus. “I ti á porté dant al minister Kurz la posiziun coletiva di raiuns dl’Euregio por ci che reverda i muciadus. Al é nezesciar da afronté la chestiun te na manira globala - á recordé Kompatscher – al é essenzial da avëi na maiú colaboraziun cun i Stac dl’Africa dl Nord y de n plann complessif da apliché ai Paisc de portignënza che é la gaujia di movimënc de migraziun. La soluziun mëss gní ciafada ala raisc, al ne basta nia ma da curé i sintoms.” Le presidënt Kompatscher á spo sotligné la gran preocupaziun por la situaziun tl Mer Mediteran: “Al’Uniun europeica ti damanunse da mët en pratica mosöres tleres y efiziëntes por evité sbarcades ajuntives y da archité atira la tragedia di morc te mer.” Por ci che reverda le Prener á le Landeshauptmann recordé che “la situaziun é sot a control, ince pro merit dla colaboraziun otimala danter les forzes dl’ordin dla Talia y Austria. Al é da capí che n Stat ois controlé i movimënc sön sü confins.”
Le minister Kurz á recordé che, sce al ess da ester nezesciar, spo é l’Austria arjignada ca da stravardé sü confins. “Mo al é dantadöt l’Europa che mëss defëne i confins esterns: l’UE mëss stlarí che le socurs tl Mer Mediteran ne é degun ticket por rové t’Europa zentrala.” Kurz á spo sotligné süa posiziun: al mëss gní mudé le sistem, i movimënc di migranc mëss gní architá sön i confins esterns dl’UE y i Stac africans mëss gní daidá da i partí sö sön i Paisc africans. Ti pröms sis mëisc dl 2017 él le movimënt di migranc tla Talia aumenté dl 20% en confrunt ala medema perioda dl 2016, aladô di dac de Frontex. “Insciö ne vara nia da jí inant”, dij Kurz. L’obietif dess ester chël da stlü le percurs dl Mer Mediteran, sciöche bele sozedü por le percurs tres le Balcan, “al é na chestiun de orenté politica de chi che pó tó les dezijiuns. Al ne pó nia ester na dezijiun di criminals dles barches.” Sciöche mosöra por regolamenté l’entrada legala t’Europa de muciadus che sciampa da veres él le Minister che fej referimënt ai programs de “resettlement”, le reinserimënt tres les organisaziuns internazionales presëntes söl post.
USP
Galaria dales fotografies
