Atualità
Dala Junta: apalc publics +17%, contrac por n miliard de euro
Aumënt dl 17% por i contrac de apalc publics tl Südtirol tl confrunt dl 2015, cun n record de sura un n miliard de euro.
Le bilanz 2016 dl Agenzia por i prozedimënc y la verda di contrac publics de laurs, sorvisc y fornidöres ti é gnü presenté incö ala Junta provinziala. Aladô di dac presentá dal diretur dl’Agenzia Thomas Mathà é les prozedöres publicades sön la plataforma SICP (Sistem d’informaziun contrac publics) tl 2016 aumentades sides por ci che reverda les zifres (+11,7 %) co ince por ci che reverda la soma complessiva (+17,1%) en confrunt cun i dac dl 2015. L’import complessif di apalc publicá superëia por le pröm iade le miliard de euro (1.186 miliuns), cun na chersciüda dl 35% ti laurs publics y de 31,6% pro les fornidöres. “Chësc é n svilup dër positif y che vá te n’atra direziun en confrunt al trend nazional. Le resultat é gnü a se le dé por mirit dl laur di ultims agn, cun la lege provinziala nöia, le rode dl’Agenzia y l’impëgn di ofizi che scrí fora i apalc”, á dit le presidënt Kompatscher.
Tl 2016 él gnü efetué prësc dötes les prozedöres de gara tla forma dl contrat d’apalt (99,3%). Les prozedöres söl portal (63.006) é aumentades dl 11,7 porcënt en confrunt al 2015, dantadöt ince por l’adoranza costanta dla plataforma pro les cumpres cun na soma de sot i 40.000 euro da pert dles scores. I comuns y les comunités raionales é les staziuns apaltantes che á scrit fora le plü gran numer de prozedöres (25.323), cun la Provinzia al secundo post (16.071). Le 53,4 % dles publicaziuns reverda prozedöres de laurs publics, le 25% de sorvisc y le 21,6 % de fornidöres. Pro i laurs publics él les impreses locales che cür le 82,6% di apalc, ti sorvisc le 64,2 % y pro les fornidöres röia les impreses locales al 33,8 %. Te chësta ultima categoria vëgnel ince cumpedé lapró les cumpres tl setur sanitar, olache i produc vëgn portá adalerch da aldinfora dla Provinzia.
USP
