Atualità
Dala Junta: metüda en segurëza dla Laimburg por 1,6 miliuns de euro
Aprové dala Junta le program planivolumetrich por i laurs de gran prescia por mëte al sigü dala tomada de peres le Zënter de Laimburg.
La Junta provinziala á aprové tratan süa sentada da incö (ai 11 de messé) la deliberaziun presentada dal Ofize geologia y proes materiales sön le “Program planivolumetrich por le smendrimënt dl prigo da tomada de peres sura le Zënter de esperimentaziun agrara y forestala de Laimburg”.
Do avëi azerté n gran prigo idrogeologich por i frabicac y i raiuns da frabiché dlungia la basa dla pert da crëp, che fej pert dl Zenter de esperimentaziun dla Laimburg, él gnü lauré fora n stüde che descrí avisa le prigo che é gnü sö dal relevamënt dla situaziun geologica, geomorfologia, geomecanica y idraulica sön le raiun dl Zënter.
L’assessur Christian Tommasini sotrissëia che al ê bele gnü realisé laota por mëte al sigü le parëi de crëp y che i laurs aprová incö reverda dantadöt n raiun dl parëi de crëp, olache al mëss gní metü en segurëza n crepun de zirca 330 tonelades.
Les mosöres preodüdes dal stüde tol ite le fissaje di crëpuns sura le Zënter de Laimburg, la realisaziun de operes por la proteziun di frabicac, le tó demez y cuncé de infrastrotöres, la realisaziun de n sistem de monitoraje y la documentaziun video di laurs. La soma di laurs preodüs dal “proiet de gran prescia” é de 1,6 miliuns de euro.
USP
