Atualità
Üties da munt, Kompatscher y Tommasini incunta i gesturs
Söporjö 5 miliuns de investimënc te 3 agn por mioré indöt 26 üties da munt de proprieté dla Provinzia, cina la fin dl ann gnarál realisé i coliamënc internet.
Al ê ai 20 d’aurí dl 2016 canche le percurs por l’assegnaziun dles üties da munt de proprieté ê jü a piz y le presidënt Kompatscher â surandé simbolicamënter ai gesturs nüs les „tles“ dles strotöres. Incö, avisa n ann dedô y cun les üties che dauriará tosc por la sajun da d’isté, él le presidënt Arno Kompatscher y l’assessur por le patrimone Christian Tommasini che á incunté i gesturs dles üties a Balsan por i rengrazié de so impëgn y por sotligné l’importanza dl’inciaria sciöche manajadú de na ütia da munt. „Nostes üties – á dit Kompatscher – é le simbol dl liam dër sterch che le Südtirol á cun les munts y les üties da munt é ince un di simboi plü importanc tl turism. Al é insciö fondamental che les üties da munt ne pois nia ma suravire, mo che ares devëntes tres de plü n punt de referimënt por chi che vá sö por munt: la chersciüda de turisć che vëgn da döt le monn é la desmostraziun che chësta strada dla revalutaziun dles üties da munt é na strada che funzionëia bun.“
L’assessur por le patrimone Tommasini á sotligné por l’ocajiun che „la colaboraziun danter le sorvisc geologia, le patrimone, la manutenziun y le frabiché, düc sorvisc de un n Departimënt, nes pormët da avëi n’atenziun adatada ales üties da munt ince por merit dl dialogh cun le CAI y l’AVS.“ La gestiun dles 26 üties da munt de proprieté dla Provinzia é gnüda assegnada tres bandides de concurs cun contrac de gestiun cina l’ann 2019 (cun la poscibilité da arlungé por atri trëi agn). Tl medemo momënt él ince gnü investí tla manutenziun ordinara y straordinara cun n budget de 4,8 miliuns de euro por la perioda 2016-19. Le diretur dla Repartiziun Aministraziun dl Patrimone Daniel Bedin á ince sotligné por l’ocajiun che „al é gnü completé söporjö le 50 porcënt di ressanamënc preodüs, mo al é ciamó tröp da fá. Tratan le 2017 dessel gní realisá i coliamënc internet tres le satelit, danter les novités él ince le sorvisc de reperibilité por i intervënc tecnics.“
Tl’ajunta él da ciafé la lista dles üties da munt dla Provinzia cun i gesturs y i dis de daurida dla sajun da d’isté 2017.
USP
Galaria dales fotografies
