Atualità

Descurida la tofla dl’Euregio sön Ciaulunch

Ince tl raiun dles Dolomites él gnü metü sö de plü tofles sön i confins dl’Euregio. Incö él gnü descurí la tofla sön Ciaulunch.

La tofla nöia trilinguala dl'Euregio sön Ciaulunch é gnüda descurida incö dal ombolt Rottonara, dal vizepresidënt Alfreider, dal presidënt Kompatscher y dal ombolt Grones (Foto: USP/Ingo Dejaco)

L’Euregio Tirol-Südtirol-Trentin ciafa tres de plü forma. Incö domisdé ai 19 de otober él gnü descurí te na zerimonia ofiziala la tofla trilinguala por ladin, todësch y talian sön le Ju de Ciaulunch, sön le confin danter le Südtirol y i trëi comuns ladins de Suramunt.

Indöt él gnü metü sö tofles sön le confin danter le Südtirol y le Ciantun Grijun, sön Valparola, sön le Ju dl Kreuzberg (Monte Croce), tles vijinanzes de Misurina, sön le Ju de Sorabances y dlungia Tour te Müstair. Do la sajun da d’invern gnarál ince metü sö na tofla sön le Ju de Stelvio. D’atres tofles gnará ince metüdes sö söi confins cun les regiuns dl Vorarlberg, dla Ciarencia, dl Salzburg y dl Paiern. Ala zerimonia ál tut pert le presidënt dla Provinzia Arno Kompatscher, le vizepresidënt y assessur ladin Daniel Alfreider y i ombolc de Corvara y Fodom, Robert Rottonara y Leandro Grones.

“Cun chëstes tofles ne orunse nia definí n confin, mo ti dé le bëgnodü a düc chi che röia tl raiun dl’Euregio, che é na regiun cun n gran spirit de colaboraziun europeica che aprijëia y tol ite ince la cultura ladina ti raiuns vijins”, á dit le presidënt dla Provinzia Kompatscher. Ince por le vizepresidënt Alfreider é la tofla n segnal de portignënza cun i trëi comuns de Suramunt. “I sun vijins y i baiun le medemo lingaz, porchël sunse ince contënc che i trëi comuns de Suramunt á n rapresentant ofizial tl’Euregio che dëida renforzé le lian cultural y linguistich cun le Vedl Tirol”, insciö Alfreider.

La dezijiun da mëte sö les tofles é gnüda tuta dal Grup europeich de cooperaziun teritoriala (GECT) dl’Euregio Tirol – Südtirol – Trentin tl mëis de ma dl 2019 cun le fin da ti dé de plü visibilité al’Euregio. Indöt vëgnel metü sö 67 tofles: 41 tl Tirol, 7 tl Südtirol y 19 tl Trentin. La realisaziun dl proiet é ince gnüda a se le dé cun la colaboraziun dl secreter general dl’Euregio da denant, Christoph Von Ach. Le tofles vëgn metüdes sö en colaboraziun cun le Sorvisc Strades dla Provinzia.

USP/ASP/san

Galaria dales fotografies