Atualità
Junta provinziala: Nominé les salf dles uniuns a Giuvani Costa
La Junta provinziala á aprové la proposta dl Comun da San Martin da nominé le salf dles uniuns a Giuvani Costa da Lungiarü. "Costa á lascé la vita por daidé i atri", dij Alfreider.
Le salf dles uniuns nü tl frabicat dlungia la scora elementara a Lungiarü ciafará le inom de Giuvani Costa, le stodafüch volontar che á pordü la vita ai 29 de otober dl 2018 tratan la ona de bur’ tëmp che á atoché döta la Provinzia. Chësta dezijiun é gnüda tuta incö ai 25 de jügn , dala Junta provinziala sön proposta de Giorgio Costabiei, ombolt dl Comun da San Martin de Tor. “Giuvani Costa á lascé la vita por daidé atri y süa dediziun é da ejëmpl por düc nos. Che le salf dles uniuns de Lungiarü ciafa sëgn so inom dess ester n sëgn de reconescënza por so impëgn por la sozieté y ince n segnal por les generaziuns che vëgn docá da se recordé dl gran valur dl volontariat y dles porsones che mët en prigo süa vita por i atri”, dij le vizepresidënt y assessur ladin Daniel Alfreider. Le salf dles uniuns dla strotöra nia é gnü inaudé ala fin de ma adöm a’atri locai ponsá sides por les uniuns co ince por les mitans y i mituns dla scora elementara. De norma él i Comuns che tol chëstes dezijiuns, mo deache al é passé manco de 10 agn dala mort él preodü na aprovaziun dla proposta da pert dla Junta provinziala.
SAN
