Atualità

Vallazza anconta i ladins de Fascia: mantenì deberieda la cultura

Dla situazion atuela di Ladins de Fascia se à l assessëur regiunel Manfred Vallazza nfurmà dan man pra i reprejentanc dla mendranza linguistica.

Vallazza anconta i ladins de Fascia: mantenì deberieda la rujeneda y la cultura

L’ancunteda te Fascia ie stata la cuntlujion de na lingia de ancuntedes dl assessëur regiunel Manfred Vallazza ti raions dla mendranzes linguistiches tla region Trentin-Südtirol. Vallazza se à te chësc cuntest nfurmà ala menuda n cont di bujëns dla mendranzes linguistiches recunesciudes y de si sustëni, che sarà ti 5 ani che vën pert de si ajënda. Vallazza ie jit a crì la grupa linguistica zimbrica a  Luserna, chëla di fersentoler, chëla di ladins tla Val Badia y te Gherdëina y śën nce chëi de Fascia.  L à abù n barat de nfurmazions cun la procuradora dl Comun General de Fascia Elena Testor y cun l cunselier provinziel Luca Guglielmi sun la scumenciadives y i programs te Fascia.

N ucajion dla prejentazion dla cultura te Fascia y dla vijita dla Majon di Fascegn cun si biblioteca ampla, si archif de film y fotografies y si culezion de documënc storics se à l assessëur regiunel fat n cheder dla situazion di ladins. Leprò fovel danter i autri l presidënt dla Majogn di Fascegn Fabio Chiocchetti, l diretëur Antonio Pollam, la sëurastanta Mirella Florian y l presidënt dla Union di Ladins de Fascia Fernando Brunel. La desfidedes te Fascia ne ie nia sciche pra d’autra mendranzes y raions dl Trentin l’emigrazion o aspec economics, ma al cuntrer la imigrazion de truepa forzes de lëur tl turism y te d’autri ciamps. Chësta reprejentëssa na desfideda per l mantenimënt dla rujeneda y dla cultura, à auzà ora i reprejentanc ladins. L vën perchël cialà de ti trasmëter nce ai zitadins che vën da oradecà la cultura y la rujeneda ladina y de i ntegré a chësta maniera tla cumenanza ladina.

"Che i reprejentanc da tlo se proa dassënn de scuné si lingaz y si cultura y che chësc ti garata nce, me plej. La paraleles danter la Val Badia y Fascia ie bendebò tleres", dij Vallazza. "Sciche reprejentant dla Region per la mendranzes linguistiches uei purté pro mi cuntribut y sustenì l plu che la va i reprejentanc locai – iust l mantenimënt dla rujeneda y dla cultura segurea nce tlo l daunì dla tradizions y usanzes y juda a seguré la cunvivënza pazifica y la cualità dla vita di fascians“ sotrissea l assessëur regiunel.

Adum cun i reprejentanc di ladins de Fascia ie l assessëur regiunel mo  jit a ti cialé ala dlieja de pelegrinasc de Santa Ujana fata su dl 1452 y la curtina di tumei dla Prima viera mundiela.

SAN

Galaria dales fotografies