Atualità
Kompatscher é gnü lité presidënt: Legalité y umanité, valurs prinzipai
Le Consëi provinzial á lité Arno Kompatscher sciöche presidënt dla Provinzia por i proscims agn cun 19 usc sön 35.
Le presidënt dla Provinzia é gnü confermé: Arno Kompatscher é gnü lité incö ai 17 de jená dal Consëi provinzial sciöche presidënt dla Provinzia de Balsan. Dles 35 usc nen él 19 che é jüdes a Kompatscher, do che al ê gnü designé sciöche candidat dla Südtiroler Volkspartei y dla Lega Salvini Alto Adige-Südtirol.
Tratan so discurs de insediamënt á le presidënt fat n referimënt tler ai dui valurs fondamentai dl program de govern: “la legalité y l’umanité”. Al se trata aladô de Kompatscher “de valurs che i desson vire realmënter, chël ó dí nia ma nen baié mo agí, por ne afronté nia tres chësta tematica cun tëma, mo ciaran al dagní cun otimism, porvan da gestí chësta tematica y nia da la subí”. Le presidënt á confermé da orëi ester le garant dl respet de chisc valurs.
Tratan so discurs á Kompatscher sotligné l’importanza dla confermaziun de so mandat: „I viun te na tera particolara, fata de porsones speziales che laora por se instësc mo ince por le bëgn de nos düc, n raiun che dá gran valur ala coretëza, ala iustizia y ales tematiches soziales, che conësc süa storia, mo che ciara ince al dagní”. Kompatscher á recordé che le program de govern che gnará traté incö domisdé te Consëi á siöche fondamënta i valurs che fej referimënt al’Autonomia y al’Europa por garantí a düc oportunités valies, segurëza dal punt de odüda sozial y n svilup economich sostenibl.
USP
Galaria dales fotografies
