Atualità
De dla mobilité dl’Euregio, trasport publich debann indoman
I aboná al trasport publich local podará viajé indoman, sabeda al 1 de dezëmber debann sön les ferates y corieres te döta l’Euregio.
Indoman, al 1 de dezëmber sarál poscibl da viajé debann söi mesi publics dl’Euregio porvia dla scomenciadia De dla mobilité. Chësta iniziativa é gnüda a se le dé por merit dla colaboraziun danter i trëi raiuns de Südtirol, Tirol y Trentin y gnará organisada dui iadi al ann, la pröma sabeda de ma y de dezëmber. “La mobilité coliëia les porsones, dëida da desfá confins y da se imparé da conësce damí y chësc é propi le fin dla scomenciadia”, á dit l’assessur Florian Mussner. Le presidënt dla Provinzia y dl’Euregio, Arno Kompatscher, ajuntëia che “la storia deboriada de i trëi teritori se renforzëia cun chëstes scomenciadies che nes consënt da adoré sinergies por mioré la perzeziun dl’Euregio tla popolaziun”.
I aboná podará viajé debann sön dötes les ferates regionales dl Tirol, Trentin y Südtirol, sciöche ince dles corieres dl trasport publich di trë raiuns. Al ne pó nia viajé sön les ferates che fej trates lungies (Frecciargento, Railjet, Eurocity, Intercity). Dötes les chertes dl Südtirol Pass y dl’Euregio FamilyPass é varëntes, sciöche ince i abonamënc anuai y de dorada lungia dl trasport publich regional. Al fej ince para ala scomenciadia le sorvisc Post Auto Schweiz che coliëia Mals cun Müstair.
Tl Südtirol él nezesciar da fá la obliteraziun dl iade te na manira regolara sciöche zënza tres, mo la tarifa sará metüda a zero (an paia indere le trasport dles rodes y di tiers). Tl Tirol y tl Trentin bastel da lascé odëi le Südtirol Pass al personal che controlëia zënza messëi obliteré le iade.
An podará ince anuzé les furnadoies che porta a Colle/Kohlern, a Vöran, a Mölten, a Meransen y söl Ritten. Por de plü informaziuns prëibel vijité la plata internet dl’Euregio.
USP
