Atualità

Dolomites UNESCO: Terassa nueva dl’arpejon mundiela te Gherdëina

Sun Mastlé a Santa Cristina àn finà la segonda terassa dla Dolomites-UNESCO arpejon mundiela tl Südtirol.

La terassa Dolomites UNESCO arpejon mundiela Mastlé - Santa Cristina Gherdëina ie n proiet dl ufize provinziel Parcs naturei- Foto: USP/Oliver Jaist

Dan trëi ani, d’instà dl 2015, àn giaurì la prima terassa dl’arpejon mundiela Dolomites-UNESCO sun l Strudelkopf tl chemun de Toblach. Śën iel tl Parch naturel Puez-Odles na segonda luegia de ududa de chësta sort. Daujin ala stazion a mont dl mplant portamont Col Raiser, ulache l passa truepa jënt, àn n ch’sta dì finà de frabiché na terassa dl’arpejon mundiela a 2.200 metri d’autëza. Chësta gëura la ududa sun l panorama da marueia di crëps dla Dolomites.

"La terasses dl’arpejon mundiela nes conta ciuldì che la Dolomites ie tan ora dl solit – de si particulariteies geologich-paesajistiches. Ch’sta terasses dëssa, defati, purté pro a les capì” sotrissea Richard Theiner, che ie respunsabl dl’arpejon mundiela Dolomites-UNESCO tl Südtirol.

La terassa Dolomites UNESCO arpejon mundiela Mastlé - Santa Cristina Gherdëina, chësta ie si denuminazion ufiziela, ie n proiet dl ufize provinziel Parcs naturei, metù a jì y finanzià adum cun l chemun de Santa Cristina. Sustenii iesi unic dal ufize provinziel Geologia y proes de materiai y dala repartizion provinziela Nfrastrutures.

La terassa dl’arpejon naturela te Gherdëina ie unida realiseda aldò dl model de chëla dl Strudelkopf a Toblach y n à cialà de la frabiché a na maniera l plu puscibl sustenibla. “Pervia dl cuntest particulermënter sensibl ons crià n obiet che ie lià a na maniera strënta a si ntëurvia. La strutura d’acel, sun chëla che l ie repurtà la lista dla pizes che ie da udëi, ie unida mplenida cun tiera y sasc tëuc dal raion ntëurvia“ - tlarësc David Messner dl studio Messner Architects, che se à cruzià de realisé i lëures. La inaugurazion ufiziela dla terassa unirà fata de juni dl 2019.

D’autra scumenciadives

Ai 20 y ai 21 de nuvëmber vëniel metù a jì a Persenon na furmazion per patrons y gestëures de sostes da mont tl raion dla UNESCO-arpejon naturela. L travert ie chël de renfurzé la funzion culturela coche luesc d’ ancunteda y de nfurmazion – dlongia chëla alpinistica – dla sostes da mont tl raion Dolomites- UNESCO arpejon mundiela y de ti pité ai gestëures a chësta maniera i mesuns che ie de bujën. Ajache, nsci dij Enrico Brutti, diretëur dl ufize provinziel Parcs naturei: “La sostes da mont ie, pervia de si posizion unica tl cuer dla Dolomites, predestinedes a sensibilisé ghesć y jënt da tlo ala tematica dl’arpejon mundiela.” Ti 9 raions dl’arpejon mundiela Dolomites-UNESCO iel de ndut 66 sostes y uties da mont.

10 ani arpejon mundiela Dolomites-UNESCO

N ie nce tl lëur de njinië la scumenciadives per chëst ann che vën: Ai 26 de juni 2019 saral diesc ani che la Dolomites ie unides detlaredes dala UNESCO arpejon mundiela pervia de si particularità geomorphologica y geologica y la belëza de si paesajes. Per chësc aniverser uniral metù a jì dloncora tl raion dla Dolomites azions defrëntes: Pra la scumenciadives plu mpurtantes saral, dlongia la inaugurazion de juni dla terassa dl’arpejon mundiela Mastlé – Santa Cristina, la festa dl’arpejon mundiela Dolomites-UNESCO a Al PLan, nce chësta de juni, coche nce, d’auton a Sest, l cunvëni per esperc Dolomites UNESCO Forum III “10 ani UNESCO arpejon mundiela“.

USP

Galaria dales fotografies