Atualità

Ciases di parcs naturai, 91.000 vijitadus tratan la sajiun da d‘isté

91.000 porsones á vijité tla sajiun da d’isté dl 2018 les 7 Ciases di parcs naturai dl Südtirol che resta davertes cina ai 31 de otober.

Söporjö 91.000 porsones á vijité les 7 Ciases di parcs naturai dl Südtirol tratan la sajiun da d‘isté (Foto USP)

Le bilanz é positif por la sajiun da d’isté 2018 por ci che reverda les vijites tles Ciases di Parcs naturai tl Südtirol che á registré indöt 91.000 vijitadus danter turisć y residënc. Danter les scomenciadies proponüdes nen él sté tröpes che á albü suzes, danterater les ativités de educaziun ambientala por mituns, les scomenciadies di Junior Ranger y de “Youth at the top”, sciöche ince le curs por le personal dles malghes. Da segnalé él ince che iniann él gnü festejé i 40 agn dl Parch natural Pöz-Odles y i 20 agn dl Parch natural Riesenferner-Ahrn.  “I obietifs prinzipai dles Ciases di parcs naturai é chi da pité relax danter la natöra, da promöie l’educaziun ambientala y da garantí la sconanza dla natöra y dl’archirida scientifica”, sotlignëia Enrico Brutti, diretur dl Ofize Parcs naturai dla Provinzia che recorda ince la desponibilité de material de informaziun y didatich por les scores.

Por dötes les porsones interessades resta les 7 Ciases di Parcs naturai davertes ciamo cina en mercui ai 31 de otober. Trëi Ciases dauriará sües portes indô da d’aisciöda y d’isté y les ater cater ciases sará davertes bele dai 17 de dezëmber cina ai 30 de merz dl 2019: al se trata dles Ciases di parcs naturai Trëi Pizes de Lavarëi a Toblach, Riesenferner-Ahrn a Türesc, Fanes-Sennes-Braies a al Plan de Mareo y Pöz-Odles a Funes. Por de plü informaziun prëibel vijité le portal internet di parcs naturai ince por ladin.

USP

Galaria dales fotografies