Atualità
#velessüdtirol18: 424.184 zitadins pó dé jö süa usc
Ales proscimes lites podará dé jö süa usc indöt 424.184 zitadins, de chisc 35.003 por posta. 14 é les listes, 420 i candidac.
La data dles lites provinziales dl 2018 vëgn tres plü daimpró. En domënia ai 21 d’otober dales 07:00 ales 21:00 podará les zitadins y i zitadins dl Südtirol jí a lité le Consëi provinzial nü. Indöt él 14 listes che se presentëia ales lites cun dötadöm 420 candidates y candidac. Les listes y i inoms di candidac é publicá sön le portal web dla Provinzia dediché aposta ales lites sön lites.provinzia.bz.it.
Lita por corespondënza
L’Ofize Afars istituzionai á mené te chisc dis indöt 35.003 zetoles lites por i litadus che dá jö süa usc por posta cun la comunicaziun che reverda la data dles lites y les modalités da dé jö süa usc. I zitadins messará dé jö süa usc cina en vëndres ai 19 d’otober. Ales lites provinziales dl 2013 él sté dötadöm 27.911 litadus che á lité por posta. I litadus südtirolej residënc foradecá pó lité ales lites provinziales tres posta y sce ai é scric ite al’AIRE (register anagrafich di zitadins talians residënc foradecá). Chësc dërt de lita pó ince gní ghiré y ademplí pro so Comun de residënza dai litadus che vir atualmënter fora dla Provinzia.
424.184 zitadins pó jí a lité
I litadus che podará dé jö süa usc pro öna dles sëntes litales dla Provinzia sará indöt 389.181 (situaziun 45 dis dan la lita), tl 2013 ê le numer de 373.050. Sce an cumpëda lapró i litadus por corespondënza spo é le numer complessif de 424.184 zitadines y zitadins en confrunt ai 400.961 dl 2013. Dötes les informaziuns prinzipales por ladin, todësch, talian y inglesc é presëntes sön la plata internet dla Provinzia dedicada aposta ales lites provinziales 2018 sön lites.provinzia.bz.it. Por avëi informaziuns ajuntives él ince atif n account facebook dla Zentrala litala che dá ince respostes a domandes di zitadins. Sön Twitter él gnü chirí fora i hashtag #wahlensüdtirol #elezionialtoadige #velessüdtirol por ciafé atira i resultac.
USP
