Atualità

Biblioteches, aprovaziun al plann 2021 por le grup ladin y todësch

Al é gnü aprové le Plann biblioteches 2021 por les strotöres dl grup ladin y todësch. Ampliamënt dla rëi, cualité y dialogh cun les biblioteches talianes.

Plann biblioteches 2021 por le grup linguistich ladin y todësch: tl retrat la biblioteca de Suc/Ciastel (Foto USP/Stefan Gamper/Helmuth Rier)

Ti ultims 20 agn él gnü a se le dé tl sistem dles biblioteches tl Südtirol na seria de mudamënc, dantadöt por ci che reverda la cualité dl’oferta. Cun le plann biblioteches 2021 por la promoziun dles biblioteches di grups linguistics ladin y todësch él l’obietif da garantí n svilup dla cualité dl sistem bibliotecar. La Junta provinziala á aprové le plann ai 11 de setëmber te süa sentada edemala. Le plann biblioteches 2021 é partí sö te 13 capitui a chi che al ti é gnü assegné ciamps d’aziun y provedimënc aposta. I compic prinzipai dles biblioteches resta l’azes debann al’informaziun y ala conoscënza por düc i zitadins, le mantignimënt dla capazité dla letöra dla sozieté y le contribut al’alfabetisaziun mediatica y informativa. Te chësc vers dará ince les biblioteches dl Südtirol so contribut por realisé l’Agenda 2030 dl’ONU por le svilup sostenibl. Al röia lapró funziuns nöies por ci che reverda l’istruziun digitala y le svilup intercultural.

Les biblioteches messará ince ciafé respostes ai mudamënc dles condiziuns generales che caraterisëia la sozieté d’aldedaincö: dala digitalisaziun te tröc seturs dla vita da vigni de, ai mudamënc dla strotöra demografica al aumënt dla mobilité individuala. La resposta dl sistem dles biblioteches südtirolejes a chëstes sfidades é da cherié na rëi de colaboraziun integrala, te chëra che vigni strotöra dais so contribut y mëtes a desposiziun sü materiai y conescënzes por düc i zitadins. Le plann biblioteches 2021 reverda i grups linguistics todësch y ladin y é gnü elaboré dala Repartiziun Cultura todëscia adöm ales biblioteches y al Bibliotheksverband Südtirol en acordanza cun i rapresentanc dl Ofize Educaziun permanënta y biblioteches dla Repartiziun Cultura taliana. Le plann é ince gnü valuté positivamënter dal Consorz di Comuns.

USP

Galaria dales fotografies