Atualità

Volontariat, normes nöies por le terzo setur

Les assoziaziuns che laora tl ciamp sozial pó se scrí ite da sëgn inant tl register provinzial dla promoziun soziala zënza messëi aspeté sis mëisc o n ann.

Regoles nöies por les assoziaziuns y organisaziuns tl terzo setur

La Junta provinziala á aprové incö, ai 3 de messé, na proposta de mudaziun dla lege provinziala sön le Terzo setur por l’adaté ales normes nazionales jüdes en forza dan da n ann cun le decret legislatif 117 de messé dl 2017. Tla provinzia de Balsan reverda les regoles nöies indöt 2.172 assoziaziuns de volontariat y 110 organisaziun de promoziun soziala.

La majera novité reverda l’iscriziun tl register provinzial por les organisaziuns de volontariat che cooperëia cun l’ënt publich tl setur sozio-sanitar, dl’assistënza, dla formaziun y dla cultura sciöche ince tl ciamp dla prevenziun y remoziun dles emarginaziuns soziales, dla promoziun y dl svilup dles ativités sportives, de recreaziun y dl tëmp lëde y dla conservaziun y valorisaziun dles tradiziuns. Sce les assoziaziuns messâ cina sëgn avëi bele lauré tl teritore provinzial da almanco n ann (les organisaziuns de volontariat) o sis mëisc (les organisaziuns de promoziun soziala) por gní scrites ite ti registri respetifs, tol sëgn jö la deliberaziun dla Junta provinziala da incö, 3 de messé inant, chësc tëmp de n ann o sis mëisc. Chësc ti conzed ales assoziaziuns, dantadöt a chëres che é impormó gnüdes metüdes sö, da ascorté i tëmps che ó ester por ciafé i vantaji che vëgn dal’iscriziun.

Zënter sorvisc nü por le volontariat

La deliberaziun müda ince la relaziun cun le Zënter sorvisc por le volontariat (CSV Alto Adige/DZE Südtirol), che le Codesc dl Terzo setur vëiga danfora da istituí por la provinzia de Balsan. Chësc Zënter gnará gestí dales medemes assoziaziuns y fej ativités por sostigní l’assoziazionism, ti pitan sorvisc de promoziun, consulënza, sostëgn y formaziun ales organisaziuns dl terzo setur. Cina che al jará en forza deplëgn le register unich nazional dl Terzo setur vëgnel mantigní i registri provinziai regolamentá dala lege provinziala n. 11/1993. Sciöche norma de transiziun vëgnel preodü che les organisaziuns, costituides do la jüda en forza dl Codesc dl Terzo setur, mëss se tigní bele dal scomenciamënt a sües desposiziuns.

 

USP

Galaria dales fotografies