Atualità

Cherta d’identité ladina: Ok dala Junta ala proposta te cater lingac

La Junta á aprové ai 28 de lugio da mené inant al Ministere di afars interns y al Commissariat dl Govern na proposta dla cherta d’identité eletronica ti cater lingac ladin, todësch, talian y inglesc.

En colaboraziun cun i parlamentars a Roma, i rapresentanc ladins a Balsan, le Commissariat dl Govern y le Ministere di afars interns él la Junta provinziala che porta inant le proiet dla cherta d’identité eletronica ince por ladin. Aladô dl Statut de Autonomia dl Trentin-Südtirol é i lingac ofiziai le talian, todësch y ladin. L'ann 1989 é le ladin gnü renonesciü, dlungia al todësch y al tailan, sciöche lingaz aministratif. Le ladin é da adoré a usc y por scrit te düc i comuns ladins dla Provinzia de Bulsan y te düc i ofizi dl'aministraziun provinziala che á da fá cun i ladins.  “Insciö él ince important che al vëgnes adoré le ladin sön la cherta d’identité eletronica nöia. Chësc é na reconescënza importanta y ghirada por nosc grup linguistich”, spliga  le vizepresidënt y assessur por la scora y cultura ladina Daniel Alfreider. La Junta provinziala á insciö incö ai 28 de lugio tut la dezijiun da porté inant la proposta de na cherta d’identité eletronica cun düc cater i lingac (ladin, talian, todësch y inglesc) elaborada dal Istitut Ladin “Micurá de Rü”.

Do la dezijiun dla Junta gnará sëgn la proposta menada inant al Comissariat dl Govern por che ince le Ministere di afars interns pois dé jö so arat y porté inant la chestiun. “Le proiet de na cherta d’identité de cater lingac vëgn porté inant da de plü perts adöm al presidënt Arno Kompatscher, al senator Meinhard Durnwalder y al assessur regional ladin Manfred Vallazza”, dij Alfreider.

Insciö él la Ministra por i afars interns Luciana Lamorgese che á respognü  dan da püch a na interograziun tl Senat a Roma che por la cherta d’identité cater lingac vëgnel lauré inant. 

USP/rc