Atualità

Formaziun nöia di insegnanc: Aprovades les regoles

Le pröm curs de formaziun por ciafé l'abilitaziun por l'insegnamënt por le livel secondar dles scores statales metará man d'altonn dl 2020. Iscriziuns davertes cina ai 24 de aurí.

Formaziun nöia di insegnanc: La Junta á aprové les regoles. (Foto: ThisisEngineering RAEng/Unsplash)

Tres n curs de dui agn, che pó gní fat ince sce an laora, sarál poscibl por le personal insegnant da ciafé l'abilitaziun por l'insegnamënt. N vare important é gnü fat incö, ai 24 de merz dala Junta provinziala che á aprové le regolamënt dla formaziun por l’abilitaziun da insigné por le livel secondar dles scores statales che reverda les scores mesanes y altes ladines y todësces.

Cun chësta formaziun nöia ne unse nia ma anuzé nosta autonomia te chësc setur, mo i podun ti pité a nostes insegnantes y nüsc insegnanc n curs de abilitaziun al insegnamënt che tëgn cunt dles esigënzes locales y che é adaté ala poscibilité da podëi lauré intratan”, spliga l'assessur por la scora y cultura ladina Daniel AlfreiderPor l'intendënta dles scores ladines Edith Ploner é chësc „n vare important por podëi colié les competënzes didatiches cun chëres metodologiches, che pó gní porvades fora deperpo cun l’aiüt de personal spezialisé“.

Le model de formaziun é gnü elaboré dala Direziun Formaziun todëscia y dala Scora y Cultura ladina adöm ala Facolté de Sciënzes dla formaziun dl’ Université Lëdia de Balsan. N pëis important ti vëgnel dé a n bun coliamënt danter pratica y teoria.

Tres le curs de fomaziun vëgnel garantí i 24 credic preodüs a livel statal ti seturs dla pedagogia/didatica, psicologia y dla metodica. Chësc ti dá ince la poscibilité ai partezipanc da tó pert ai concursc de abilitaziun. La formaziun é adatada ales esigënzes locales dla formaziun ladina y todëscia. Al é ince preodü n acompagnamënt tratan döt le tëmde stüde.

Le curs de formaziun gnará metü da jí vigni trëi agn. Por lann de scora 2020/21 gnarál metü da jí le curs por les materies leterares, por i lingac foresć, por fiolosofia, storia, sciënzes umanes y geografia.

De plü informaziuns sön l'iscriziun y les modalités dl curs gnará metüdes a desposiziun sön les plates internet dla Direziun Formaziun todëscia y la Scora y Cultura ladina.

Informaziun por ladin: http://www.provinzia.bz.it/formaziun-lingac/scora-ladina/it/personale-dirigenziale-e-insegnante.asp

Informaziun por todësch: http://www.provinz.bz.it/bildung-sprache/deutschsprachige-schule/bildungsverwaltung/816.asp

 

USP/jw/rc

Galaria dales fotografies