Atualità
Kompatscher avertësc de malintenzioná che cöi adöm spënores
Te tëmps de crisa crëscel la desponibilité dla jënt da daidé cun spënores. Sëgn él bel porsones che ó sfruté la desponibilité dla jënt da fá donaziuns, avertësc Kompatscher
"Nosc sistem sanitar á finanziamënc assá. A scomenciamënt dla difujiun dl Covid-19 él gnü metü a desposiziun i mesi finanziars nezesciars por podëi curé i paziënc y por podëi afronté la crisa", sotrissëia le Presidënt Arno Kompatscher. "An finanziará döt ci che gnará adoré. Düc i investimënc y les cumpres che jará debojëgn podará gní fates. Plü co ater sunse preocupá por i injigns sanitars y le material de proteziun che n’é nia demestrú da ciafé y a desposiziun da podëi cumpré."
"Tröpes porsones de buna orenté ó daidé te chëstes situaziuns straordinares, ince cun spënores o donaziuns. Chësc é n bel sëgn de solidarieté y desmostra nosc spirit de comunité", detlarëia le Presidënt Kompatscher. "Por evité che chëstes donaziuns vais dl falz vers, desson chirí fora les assoziaziuns de aiüt y uniuns bele conesciüdes te Südtirol de chëres che an pó se fidé. Ince da pert dla Aziënda sanitara él gnü daurí n cunt ofizial. Cun chëstes donaziuns vëgnel sostigní families y aziëndes che é rovades en dificolté. Donaziuns de material sciöche mascores de proteziun y d’ater material de proteziun pó gní dé jö pro la seziun dla Crusc Blancia (Tel. 800110911)", dij inant Kompatscher.
Le Presidënt avertësc cun insistënza da ne fá nia spënores sön apel de racoiüdes che roda bele te Südtirol da pert de jënt che ingianëia, suradöt ince ti social media.
USP/ea/rc
