Atualità

Werni y la storia dla TERA – na publicaziun plurilinguala

Dan da püch él gnü presenté tl salf dla scolina Salieta a Urtijëi le liber ilustré "Werni y la storia dla TERA" cun le sföi d’acompagnamënt sura la tematica dla sconanza dl clima

"Werni y la storia dla TERA" é gnü realisé tres la colaboraziun inanter le Ciamp Pedagogich dla Intëndenza y Cultura ladina y la Direziun dles scolines "Ladinia". (Foto: ASP)

La publicaziun nöia dal titul "Werni y la storia dla TERA" é gnüda presentada dan da püch tla scolina Salieta a Urtijëi. Al se trata de n liber scolastich cun fins pedagogics che é sëgn danman tles verjiuns de gherdëna, badiot, talian y todësch. Pro la presentaziun dl liber êl prejënc la Direturia dla Intendënza y Cultura ladina Edith Ploner, le Diretur dl Ciamp pedagogich Felix Ploner, la Ispeturia por les scolines ladines Elisabeth Baur y la Direturia dla Direziun dles scolines "Ladinia" Hannelore Insam. Cun la publicaziun dl liber ilustré él ince gnü fora n sföi d’acompagnamënt por i geniturs y le personal pedagogich cun informaziuns sön l’alimentaziun y la sconanza dl clima.

"Werni y la storia dla TERA" é gnü realisé tres la colaboraziun inanter le Ciamp Pedagogich dla Intëndenza y Cultura ladina y la Direziun dles scolines "Ladinia". La realisaziun grafica é de Marameolab, le conzet y le contignü dl liber ilustré de Ivonne Daurù Malsiner y de Juna Moroder. La coordinaziun dl proiet y l’adatamënt dl sföi d’acompagnamënt á surantut Ute Senoner y Anita Demetz. La traduziun y le letorat di tesć é gnüs fac dal ofize Chestiuns linguistiches dla Provinzia.

Les tematiches dl mangé sann y dla sostenibilité climatica vëgn aprofondides ti proscims trëi agn sciöche tematiches zentrales te dötes les 17 scolines ladines. Tres deplü ofertes didatiches gnará aprofundí i contignüs. La maestra de scolina Juna Moroder á porvé fora 5 unités didatiches che la ti á metü a desposiziun dl personal pedagogich. Tres chësc proiet vëgnel insigné ai mituns y ales mitans che an resta sagns intun sce an mangia tröpa ordöra y verzöra de sajun y dla regiun. Cern y patüc duc desson ma mangé vigni tant y foradechël cumpré ite ciaran de sparagné cun la plastica.

Pro la presentaziun dl liber êl prejënc la Direturia dla Intendënza y Cultura ladina Edith Ploner, le Diretur dl Ciamp pedagogich Felix Ploner, la Ispeturia por les scolines ladines Elisabeth Baur y la Direturia dla Direziun dles scolines "Ladinia" Hannelore Insam.

De plü informaziuns y ince le sföi d’acompagnamënt ciafon online sot a: www.pedagogich.it.

USP/san

Galaria dales fotografies