Atualità

Continuité ti resultac y por le dagní colaboraziun scora-monn dl laur

I assessurs por la scora y i suranstanc scolastics á presenté incö ai 15 de lugio a Balsan n bilanz dl ann de scora apëna rové. Dui 100 y un n 100 cun lalt.

Conferënza stampa tradizionala de contlujiun dl ann de scora (Foto: USP/Roman Clara)

Inann á la conferënza stampa tradizionala dl fin dl ann de scora metü man cun n’introduziun da pert di assessurs por la scora ladina Daniel Alfreider, por la scora todëscia Philipp Achammer y por la scora taliana Giuliano Vettorato. L’assessur Alfreider á sotligné por l’ocajiun “l’importanza da svilupé inant trëi pilastri fondamentai de nosta scora ladina: da öna na pert l’insegnamënt dla cultura y dl lingaz ladin adöm al sostëgn dl plurilinguism, mo ince la introduziun de na relaziun strënta danter le monn dl laur y dla scora”, insciö Alfreider. Les mitans y i mituns dess bele ti pröms agn de scolina y scora rové en contant te na manira plajora cun la pratica. “N ater pilaster che i orun ince svilupé inant te na manira scientifica é le plurilinguism cun stüdi y inrescides che se mostra sö i punc de forza dla didatica integrada, mo ince olache i podun ciamó otimisé l’insegnamënt”, insciö Alfreider.

L’intendënta Edith Ploner á presenté i dac di ejams dla scora mesana y alta, sotlignan “che i resultac é te n trend positif valgamia en continuité cun i agn da denant che confermëia la buna preparaziun dles scolares y di scolars, che s’arjigna ca adöm al gran aiüt dles insegnantes y di insegnanc a chësta proes de contlujiun dl percurs formatif”.

Indöt él sté 3.961 scolares y scolars che á stlüt jö positivamënter l’Ejam de Stat dles scores altes te döt le Südtirol (100 tles scores ladines, 2.730 tles scores todësces y 1130 te chëres talianes). Por ci che reverda l ejam de contlujiun dles scores mesanes é la proa finala gnüda superada da 5811 scolares y scolars (4155 tod, 1394 tal., lad. 262). La direturia dles Scores primares y secondares por todësch Sigrun Falkensteiner á presenté i resultac finai por ci che reverda le monn dla scora todëscia, l'intendënt dles scores talianes Vincenzo Gullotta á indere fat na suraodüda sön i resultac de contlujiun tl monn dla scora taliana. 

I dac de contlujiun dl ann de scora tles valades ladines

I dac de conclujiun dl ann de scora é spo gnüs presentá dal‘Intendënta dles scores ladines Edith Ploner. Por ci che reverda l’Ejam de Stat tles scores altes ladines á düc i 101 candidac ametüs/candidates ametüdes passé l’ejam de maturité. Dui candidac ne é nia gnüs ametüs. Indöt á ciafé 18 candidac danter 61 y 70 punc, 48 candidac á ciafé danter 71 y 80 punc, 23 candidac á ciafé danter 81 y 90 punc, y 3 candidac á ciafé danter 91 y 99 punc. La nota 100 y 100 cun lalt é gnüda assegnada trëi iadi: al se trata de De Nicolò Nadja (Lizeum d’Ert Cademia), de Mauroner Jessica (Istitut Tecnich Economich Raetia) y de Pizzini Silvia (Seziun sciënzes umanes dla scora alta da La Ila).

Por ci che reverda l’ejam de conclujiun dles scores mesanes á ciafé düc i 262 scolares y scolars n arat positif. 23 scolars é passá cun “sis”, 76 scolars cun “set”, 80 scolars cun “ot”, 65 á ciafé la nota “nü” y 11 scolars á ciafé la nota “diesc”. La nota plü alta, “diesc cun lalt” é gnüda assegnada 7 iadi. Dui scolars ne é nia gnüs ametüs al ejam de contlujiun.

Por ci che reverda la valutaziun complessiva dles scores altes ladines é le 96,62 % di studënc gnü ametüs ala classa suandënta (502 studënc),41 de chisc messará ciamó recuperé n valgönes materies tratan l’isté por passé ala classa che vëgn do; 17 studënc ne é nia passá.

Tles scores mesanes dles valades ladines él passé 775 scolares y scolars ala classa suandënta (98,85 porcënt), 9 scolars ne é nia passá. Tles scores elementares él gnü ametü 1136 scolares y scolars ala classa che vëgn do, 1 n scolare ne é nia passé.

706 mitans y mituns á frecuenté les scolines dles döes valades ladines. La tabela cun düc i dac y resultac é gnüda injuntada

USP

Galaria dales fotografies