Atualità
Entrada dla Val Badia: Contrat firmé – I laurs pó mët man
I rapresentanc dla Provinzia y dl’assoziaziun dles impreses che á ciafé l’apalt á firmé le contrat por la costruziun dl’entrada nöia dla Val Badia.
Alisiré le trafich che vëgn dala Val Badia fora San Laurënz, amplié la segurëza stradala y aumenté la cualité de vita dla popolaziun che vir a Flaurënz y San Laurënz – chisc é i obietifs prinzipai dla entrada stradala nöia por la Val Badia. Incö, vëndres al 1 de merz, él gnü firmé a Flaurënz le contrat cun l’assoziaziun de impreses cun a cé la Strabag Ag da pert dl assessur por la viabilité Daniel Alfreider, dal diretur dla Repartiziun Infrastrotöres Valentino Pagani y dala suranstanta dla Strabag, Marina Humitsch. “La mobilité é n bojëgn primar dles porsones y al é öna de nostes priorités da costruí la strotöra dla viabilité adatada por les nezescités dla jënt che vir tles valades”, á dit l’assessur Alfreider. L’entrada nöia ne é nia ma n’alisiraziun por la Val Badia y la Val de Puster mo ara aumentëia ince la cualité de vita dla jënt che vir söl post”, á dit l’assessur. Tl mëis de merz gnará les carateristiches temporales dl proiet presentades ai zitadins, á dit Alfreider.
“Por le Comun de San Laurënz é le proiet de importanza fondamentala, dantadöt sce i ponsun ales codes de auti che passa de por de fora por la Val Badia. Sciöche valur mesan él söporjö 6.000 auto che passa al de”, á dit Martin Ausserdorfer, l’ombolt dl Comun de San Laurënz. “Cun chësc proiet ne vëgnel nia ma ciafé na soluziun por la fraziun de Flaurënz, mo ince por San Laurënz, San Martin y por la strada comunala danter Montal y Ehrenburg”, á dit Ausserdorfer. Ince Albert Palfrader, l’ombolt dl Comun de Mareo, á sotrissé la gran importanza dl valur a inom di ombolc presënc Giorgio Costabiei (San Martin), Angel Miribung (La Val) y Iaco Frenadaemetz (Badia). “I un aspeté cotan a chësta opera stradala y i sun contënc che i laurs pó mëte man te püces edemes y che dess rové te 900 dis por eliminé les codes te auti dala Val Badia fora”, á dit Palfrader.
Por la direturia dla Strabag AG, Marina Humitsch, él n gran onur podëi lauré para a un di proiec stradai plü importanc dla Val de Puster. “Nosta priorité resta la cualité, la segurëza söl post de laur y i limic ambientai da respeté”, á dit Humitsch a inom dl’assoziaziun de impreses cun a ce la Strabag AG, Alpenbau S.r.l, Moser & CO. S.r.l. y Geobau S.r.l.
Le diretur de Repartiziun Valentino Pagani á dit che i laurs podará mët man te n mëis y dess rové da d’altonn 2021.
Le proiet “Entrada nöia dla Val Badia cun tunel a Pflaurenz” tol ite la sistemaziun dla trassa dla stada statala de Puster (S.S. 49), dala ota dl Kniepass cina al tunel de Ciastel Badia y la realisaziun de na strada de coliamënt tla Val Badia. La carateristica plü importanta dl azes nü ala Val Badia é le grop stradal zënza incrujades che daidará da mantigní n flus dl trafich plü regolar.
La strada d’azes é arbassada tl terac, ara passa ia cun n punt le lech artifizial dl Kniepass y va spo tl Klosterwald sura la linia dla ferata de Puster fora, rovan ite te n tunel lunch 990 che la coliëia spo a süd cun la stada da sëgn che condüj tla Val Badia. Döta la strada che taia la val romagn plü o manco da plan, cun ma püch deslivel cun i prá y i ciamps dla valada. Por limité ciamó deplü l’impat sön le paesaje, gnará la rampa tla ota da jí fora en gran pert curida. L`investimënt complessif é de 75,5 miliuns d’euro. La lunghëza totala dl proiet é de zirca 3.300 metri, de chisc 1,291 metri por l’azes ala Val Badia y 2 chilometri ampliamënt dla stada statala de Puster. La lunghëza punt é de 140 metri, chëra dl tunel de 990 metri.
USP
Galaria dales fotografies
