Atualità
Curs de formaziun trienala por 30 doturs de familia
Le curs de formaziun de trëi agn por 30 doturs de medejina generala metará man tosc ala Scora provinziala alta de sanité “Claudiana” de Balsan.
La Junta provinziala nöia á aprové tratan süa pröma sentada (ai 29 de jená) la bandida dl concurs por l’amisciun de 30 laureá y laureades al curs de formaziun spezifica de medejina generala por i agn 2019 – 22. La mosöra â bele ciafé l'arat positif de novëmber dal Comité provinzial por la programaziun sanitara, che â araté important da mëte a jí la formaziun de trëi agn de doturies y doturs de familia jogn ajache al mancia doturies y doturs de familia. Tratan la conferënza stama á le presidënt dla Provinzia, Arno Kompatscher, sotligné che “en conscidraziun dla mancianza de doturs de familia y en acordanza cun les perts interessades él gnü tut la dezijiun da aumenté i posć de formaziun spezialistica por doturs de medejina generala da 25 a 30 al ann.”
Por scemplifiché l’azes al concurs y aumenté l’interes da pert dles candidates y di candidac potenziai vëiga danfora la bandida che al sides döes dates por dé jö la domanda, öna por la pröma sessiun cina les 12.00 dl 30ejim de do la publicaziun dla bandida tl Boletin Ofizial dla Regiun; les domandes por la secunda sessiun mëss gní dades jö dai 15 d'aurí ai 15 de ma dl 2019 dales 12.00. Al é ince preodü döes dates por l’ejam, la pröma sessiun é ai 10 d'aurí dl 2019 y la secunda ai 12 de jügn dl 2019.
Düc i practicums y seminars dla formaziun spezialistica por i doturs de medejina generala sará tles repartiziuns acreditades ti ospedai dl Südtirol y ti ambulatori de n valgönes doturies y de n valgügn doturs de familia bele en sorvisc. I ejams d'amisciun y chi finai gnará organisá dal Ofize Ordinamënt sanitar. La formaziun gnará fata tl Zënter de formaziun spezifica de medejina generala che laora tla Scora provinziala alta de sanité “Claudiana” de Balsan. Tla medema sentada dla Junta él gnü aprové ince le plann de trëi agn di posć de formaziun dl Zënter olache al é preodü 30 posć por la formaziun al ann, ajache al mancia doturies y doturs.
L’Assessorat por la sanité y l’Aziënda sanitara ciara bele dî da fá val’ cuntra la mancianza de doturies y doturs de familia cun strumënc adatá; an á ma bria da ponsé che de setëmber dl 2018 á 14 doturies y doturs stlüt jö so percurs formatif de trëi agn y arjunt la spezialisaziun de dotur de medejina generala. 9 d'atri á metü man so percurs formatif de trëi agn por arjunje le diplom de dotur de familia de jügn y 16 l’á arjunt d'otober dl ann passé.
Les doturies y i doturs che fej la formaziun spezialistica ciafa n stipendium provinzial de 2.084 euro, n'indenité de 450 euro por l’atestat de bilinguism.
USP
