Atualità

Bur tëmp: contribuc por l’asport dl lignan dai bosć

Löm vërda dala Junta al sostëgn por porté demez le lignan tomé tratan y do le bur tëmp dla fin de otober. Contribuc danter i 9 y i 16,50 euro por meter cubich

La Junta provinziala á aprové i criters por l’assegnaziun di contribuc por porté demez le lignan dai bosc – Foto: USP/Repartiziun Bosc

La Junta provinziala á aprové incö danmisdé (ai 8 de jená) i criters por la conzesciun di aiüc publics por la lauraziun y l’asport dai bosć dl lignan tomé tratan le bur tëmp dai 29 ai 30 de otober. “L’obietif prinzipal de chësta dezijiun é chël da sostigní i proprietars de bosć danejá dal bur tëmp ala fin d’otober sot forma de contribuc. Al dess ince ester n impuls por la prevenziun de desgrazies naturales sciöche les fitopaties y les infestaziuns de parasic”, spliga l’assessur competënt Arnold Schuler. Al pó damané do n contribut düc i proprietars de bosć dles zones atocades dala desgrazia. Al vëgn damané l’iscriziun al ofize anagrafich provinzial dles pices impreses (APIA).

Le contribut vëgn determiné tignin cunt dles spëises plü altes por condüje demez le lignan te condiziuns de dificolté. Al vëgn araté n contribut de 9 euro por meter cubich de lignan tomé por gauja dl vënt y che vëgn trasporté cun n tractor, n harvester o na binda. Sce al vëgn trasporté le lignan cun n ciaval gnarál paié fora 12 euro por meter cubich y de 15 euro sará le contribut por ci che reverda le trasport cun na teleferica. 16,50 euro vëgn paiá fora sce le lignan vëgn trasporté cun n joler. Sce al vëgn adoré döes formes de trasport por le medemo lignan ne gnarál nia paié fora le dopl. Por le trasport de lignan cun le joler vëgnel conzedü n contribut ma sce chësta forma de trasport é motivada dal verbal dla zetola de amisciun. Por trasport él miné le spostamënt dl lignan dala posiziun atuala ala pröma strada por camions o tractors. La domanda mëss gní scrita fora dai formulars dl’aministraziun provinziala y presentada dan le scomenciamënt di laurs pro la Staziun forestala competënta.

USP

Galaria dales fotografies