Atualità
Bur tëmp te Puster y tla Val Badia: laurs por 900.000 euro
Laurs por feter dui miliuns de euro tla Val Badia y te Puster do le bur tëmp ala fin d'otober: 16 pacheres, passa 20 camions y 25 lauranti.
Ala fin dl mëis d'otober á les gran plöies gaujé inondaziuns che vëgn a se le dé cun chësta intensité y violënza mesanamënter vigni 50 cina 100 agn ti raiuns dla Gran Ega, dl rü de Le Sest, dla Drava y dla Riënza. Tl'Alta Val de Puster é i majeri dagns gnüs registrá a Sanciana y reverda dantadöt i frabicac. Defora dai raiuns abitá é i majeri dagns gnüs registrá ti raiuns de vegetaziun che vá debojëgn por sconé les strades y les infrastrotöres. "Do le gran vënt y la forza d'erojiun dl’ega él dër tröp lignan y giarun ti lec di rüs" spliga Rudolf Pollinger, diretur dl’Agenzia provinziala por la Proteziun zivila.
Laurs por 900.000 euro
Atira do le bur tëmp á l’Ofize Sistemaziun di rüs da munt y paralovines ost dl’Agenzia por la Proteziun zivila metü a jí i intervënc por sistemé i raiuns atocá. Dal scomenciamënt de novëmber él gnü lauré cun 16 pacheres, passa 20 camions y 5 capiscuadra cun indöt 20 lauranti, por ti ester ai dagns registrá dantadöt ti comuns plü atocá dla Val Badia y de Puster. Cina a sëgn é i lauranti stá bugn da porté demez la maiú pert de giarun y mëte en segurëza i punc interessá dala majera erojiun. "A chësta moda é i laurs plü importanc por la proteziun di zëntri abitá atocá gnüs fac" spliga Sandro Gius, diretur dl ofize che se crüzia de chisc intervënc. Al é ince gnü registré dagns aper dla strada de Le Sest, dla strada tl Höhlensteintal y chëra dla Val Badia, sciöche ince aper de plü trus dla roda y de paslunch. I laurs por mëte en segurëza á revardé de plü condütes dles eghes pazes tla Val Badia y a Sanciana. Cina sëgn é i cosć de chisc intervënc de 900.000 euro.
N miliun desponibl por le 2019
Püch dan Nadé él jü debojëgn da archité i laurs porvia dl tëmp da d'invern. Pornanche les temperatöres s'alza indô y le frëit dl invern lascia do podará indô jí inant i laurs. Por sistemé i dagns che i conesciun cina sëgn él gnü metü a desposiziun por le 2019 ciamó n miliun de euro, por la gran pert finanzié dala Proteziun zivila nazionala.
USP
Galaria dales fotografies
