Atualità

Lauré por n’economia plü daimpró ales families

La Consulta por la familia s‘á incunté cun na seria de operadus economics por realisé vari che ti vá adincuntra ales esigënzes dles families.

La Consulta por la familia s’á incunté da püch cun na seria de operadus dl ciamp economich – Foto: USP/H. Wisthaler

“Atenziun tl confrunt dles families y dl’economia”. Chësc é sté dan da püch la tematica zentrala de na incuntada danter la Consulta por la familia y l’Assoziaziun di operadus economics (Südtiroler Wirtschaftsring). Tratan l’incuntada eson rová a öna da adoté de plü mosöres por le bëgn dla familia ince sce al resta de gran desfarënzies danter le laur tl setur privat y chël tl’aministraziun publica. Dantadöt por ci che reverda la dorada dla maternité y paternité y le dërt da lauré a mez tëmp do chësta perioda a ciasa.

Aladô dl’assessuria provinziala por la familia, Waltraud Deeg, “dantadöt tla perioda lungia y conscidran la mancianza de forzes de laur él l’economia che á ma vantaji da atué mosöres a bëgn dla familia. Chësc ince deache tla chirida de posć de laur él chëstes mosöres che fej fora tröp por tó la dezijiun da pert de interessá. Al podess deventé n valur implü por les aziëndes ti confrunc di lauranc.” Aladô de Hannes Mussak, diretur dl Südtiroler Wirtschaftsring, “él la maiú pert dles aziëndes tl Südtirol che vëgn manajades da families y la sintonia danter familia y laur é porchël dër sintida. L’obietif é chël da sostigní les porsones da ciafé de bunes sinergies danter le laur y la familia”.

Sides la Provinzia che ince en pert le Stat sostëgn les aziëndes tres mosöres dl “welfare dles aziëndes”. Danter chëstes mosöres él por ejëmpl les alisiraziuns fiscales por les prestaziuns finanziares por i daturs de laur a bëgn de colaboradus y dles families. Les assoziaziuns de impreses che fej pert dl SWR á assiguré da orëi ti dé plü importanza a mosöres te chësc setur. N’atenziun particolara ti vëgn dada ince ales mosöres dla Provinzia y di COmuns che reverda l’assistënza tl tëmp dl’infanzia.

Tl dagní dess chësta assistënza gní ampliada. “Por merit de chësta colaboraziun danter la Consulta por la familia y les assoziaziuns de imprenditurs dess nosta Provinzia se svilupé tres deplü a bëgn dles families y de sües nezescites”, insciö Deeg.

 

 

USP

Galaria dales fotografies