Atualità

Dala Junta: les dezijiuns plü importantes

Dala gestiun futura dl’autostrada dl Prener, ABD, ala sozieté BrennerCorridor cina ala promoziun de films: de plü é stades les dezijiuns dla Junta.

La surandada dla conzesciun por la gestiun dl’autostrada dl Prener por i proscims 30 agn da pert dl Ministere por les Infrastrotöres vëgn arjignada ca cun slöm da pert di governs provinziai. Do che la Junta regionala á aprové la fondaziun dla sozieté inhouse “BrennerCorridor” y do che i presidënc dles Provinzies, Arno Kompatscher y Maurizio Fugatti, á stlarí cun le minister por les infrastrotöres Danilo Toninelli n valgönes domandes, á la Junta provinziala fat incö ai 13 de novëmber le proscim vare: ara á aprové les propostes de statut dla sozieté y dl at de costituziun dla BrennerCorridor AG.

Sciöche al é scrit tla delibera ará la sozieté inhouse BrennerCorridor le compit da manajé tl interes publich l’infrastrotöra dl’autostrada dl A22 da Prener a Modena, da amplié l’infrastrotöra y da mëte averda ala “funzionalité, al’efiziënza y ales condiziuns soziales y dl ambiënt.” La sozieté dl Prener ará ince le compit da promöie le spostamënt dl trasport dles marcianzies dala strada sön les scines y da amplié les staziuns da ciarié/desćiarié les marcianzies sön scines, danterater chël a Verona. La basa iuridica por la conzesciun por i proscims 30 agn é che la sozieté mëss ester daldöt publica y chësta acordanza é gnüda definida varënta dal Consëi de Stat ai 26 de jügn dl 2018.

Implü á la Junta tut la dezijiun da dé jö les cuotes che ara á pro la sozieté che manajëia l’aeroport da Balsan, la ABD. La Junta á aprové sön proposta dl presidënt Kompatscher la dezijiun da scomencé na prozedöra de venüda dl 100 porcënt dla partezipaziun publica pro la sozieté ABD sciöche ince preodü dal referendum di 12 de jügn dl 2016. Sciöche proscimo vare gnarál aprové na bandida de concurs por la surantuta dla gestiun por 3,8 miliuns d euro. “Por avëi la basa iuridica nezesciara él sté debojëgn da avëi deplü tëmp, mo sëgn sunse tan inant da podëi scrí fora”, á dit le presidënt Arno Kompatscher. La sozieté nöia che ciafará la conzesciun por la gestiun dl aeroport messará le fá aladô dles diretives dla istituziun dl’aviaziun zivila ENAC por i proscims vint agn.

N’atra dezijun tuta dala Junta incö sön proposta dl assessur por la mobilité Florian Mussner é stada chëra dla marca “M” por le trasport publich local. Löm vërda dala Junta ince ales conzesciuns por i sorvisc dl trasport publich sön furnadoies y trams cina la fin dl 2019. Impü él ince gnü aprové les conzesciuns dles linies dles corieres al intern dles cités y tles vijinanzes cina ai 31 de dezëmber dl 2019. Intratan gnarál lauré sön les bandides de concurs nöies, les condiziuns economiches y tecniches resta söporjö les medemes.

La Junta provinziala á ince aprové incö ai 13 de novëmber na lista cun films da sostigní tres le fonds metü sö aposta. Pro la Film Fund & Commission de IDM Alto Adige él gnü dé jö 12 propostes da sotmëte al'atenziun dla junta provinziala por l’aprovaziun definitiva, 7 á ciafé n arat positif dala comisciun de esperc. Incö (ai 13 de novëmber) él rové adalerch l'autorisaziun da pert dl esecutif de Palaz Widmann, che á aprové n stanziamënt de un n miliun de euro, soma che portará ca 1,6 miliuns de euro tl raiun provinzial sot forma nia ma de valur ajunté dal punt de odüda dl'imaja turistica, mo ince de ocajiuns de laur por profescionisć jogn dl post.

La condiziun por ciafé n finanziamënt publich é che les produziuns por la televijiun y de films investësces tl Südtirol altamo le 150% de ci che ai á ciafé; mesanamënter arjunj chësta soma le 180%. I dis che al vëgn tut sö sön le teritore provinzial preodüs é 40, i proiec finanziá é 7, de chisc 2 dala Talia, dui dal’Austria y trëi dala Germania. Al se trata di films “Zweite Luft” de Dominique Lorenz, dl proiet “Zorro” de Ronny Trocker, dl film “Die gespaltene Zunge” de Peter Brunner, dl documentar “Faith” de Valentina Pedicini, dl film “Turn of the tide” de Nancy Camaldo da Balsan, dl documentar “Lamento of the Seagulls” de Carmen Tartarotti da Latsch y dl proiet “Schnee” de Michaela Taschek.

La sozieté d'aziuns Pensplan Invest dess gní trasformada te na sozieté inhouse. La Junta provinziala é a öna sön chësc. Por la sentada che vëgn dla sozieté ordinara y straordinara dla sozieté d'aziuns Pensplan Invest SGR á la Junta provinziala aprové incö (ai 13 de novëmber) la mudaziuns da Pensplan Invest SGR AG a na sozieté inhouse dles döes Provinzies de Balsan y de Trënt, sciöche ince dla Regiun Trentin-Südtirol. Te süa sentada da incö á la Junta provinziala fat la proposta da mudé la denominaziun da Pensplan Invest SGR a Pro Euregio Sozieté de aministraziun dl sparagn y aprové le statut nü dla sozieté y la composiziun di gremiums che alda lapró.

La dezijiun finala sön la forma dla sozieté gnará tuta ala fin de novëmber dala sentada dla sozieté ordinara. Chësta nominëia le consëi d'aministraziun de trëi componënc y la comisciun de verda metüda adöm dal presidënt, dui mëmbri ordinars y dui mëmbri straordinars. "Tres la creaziun dla sozieté d'aministraziun dl sparagn controlada dales Provinzies de Balsan y Trënt, sciöche ince dala Regiun - che sará porchël daldöt tles mans publiches- sarál poscibl da realisé strategies da faziun por le svilup economich dl teritore, che ará conseguënzes positives sön le PIB y l’ocupaziun, y da ti dé insciö valur ala promiscima Pro Euregio SGR", é sigü le Presidënt dla Provinzia y dla Regiun Arno Kompatscher.

USP