Atualità
Bur tëmp tl Südtirol, definí les priorités y plann d’intervënt
Incö él gnü a se le dé la pröma reuniun tecnica cun i prorietars di bosć danejá y i ombolc di Comuns atocá. Kompatscher: Fonds straordinars y plann d’intervënt
Na mësa torona de laur sön co jí inant cun la recuperada y la venüda dl lignan, n fonds d‘emergënza davert da atira por i pröms intervënc y n management plan por che “düc sais ci y co che les cosses gnará fates”. Al é chëstes les prömes mosöres presentades incö ai 6 de novëmber dal presidënt dla Provinzia Arno Kompatscher y dal assessur por la proteziun zivila Arnold Schuler tl contest de na reuniun tecnica organisada tla Scora forestala Latemar por fá le punt dla situaziun di bosć dl Südtirol do la nöt di 29 de otober che á gaujé de gran dagns por n volum de 600.000 metri cubics. Ala reuniun tecnica ál tut pert ince söporjö 100 proprietars de terac danejá. N punt che sará ciamó da stlarí é la gran cuantité de lignan che é sëgn sön le marcé che comporta na diminuziun de so prisc cun conseguënzes por i proprietars che podess deventé gravoses. N ater punt critich é la stabilité di ërc che gnô garantida dai lëgns.
Danter les priorités nominades tl conest dla reuniun tecnica de incö danmisdé: la sistemaziun dles strades forestales y la logistica dl trasport dl lignan y le finanziamënt de chëstes prozedöres. Le presidënt dla Provinzia Kompatscher á sotligné l’esigënza da mantigní n „raport ecuilibré y pratich do chësta situaziun gravosa che reverda döta la comunité. I orun sëgn mëte en pe n management plan coordiné cun dötes les perts interessades. Tl plann, che sará danman te n per de dis, gnarál ince definí i vari por i proprietars de terac danejá”. Incö domisdé él gnü a se le dé la pröma incuntada dla mësa torona sön le lignan, olache al é ince gnü debatü sön le rode dles siëies. Inier á le presidënt Kompatscher emané dui decrec, un che reverda le status de calamité a livel provinzial por alisiré les prozedöes y smendrí la burocrazia y l’ater é por fá domanda d’azes al fonds straordinar istituí a livel statal por les emergënzes do le bur tëmp. Al’incuntada da incö damisdé ál tut pert danterater Mario Broll, diretur dla Repartiziun Bosć, Josef Schmiedhofer, diretur dl’Agenzia dl Demane provinzial, Philipp Sicher, diretur dla Repartiziun Strades y Markus Dejori, ombolt dl Comun de Nova Levante, le vize-ombolt Jürgen Pardeller y le presidënt dl comprensore di stödafüch volontars Martin Künig.
Audio Broll, Schuler, Kompatscher
USP
Galaria dales fotografies
