Atualità
Ona de bur tëmp "epocal": plüra por le stödafüch mort a Lungiarü
Al é gnü 200 litri de plöia por meter cuadrat, al jê da vënt sciöche mai tl Südtirol. Plüra por le stödafüch Giovanni Costa.
Do la sentada da incö damisdé (ai 30 d'otober) á la Proteziun zivila metü le livel d'alarm da cöce (Charlie) a arance (Bravo), ajache al n'é nia de gragn prighi por la popolaziun. Ti ultimi dis él gnü mesanamënter 200 litri de plöia por meter cuadrat, y dantadöt a Le Sest, 370 litri, na cuantité dui cina trëi iadi les prezipitaziuns che an s'aspeta te n mëis.
"Ti ultimi dis – dij le presidënt Arno Kompatscher - á la proteziun zivila y düc i socoridus lauré a na moda ezezionala por garantí la segurëza dla popolaziun. A ëi ti vá mie rengraziamënt sides istituzional che personal. Tl medemo tëmp oressi ti fá mies condolianzes ala familia dl stödafüch che é mort tartan n intervënt". N evënt tan tragich, á dit l’assessur por la Proteziun zivila Arnold Schuler, "che mët tl’ombria düc i atri evënc".
Dal punt d'odüda meteorologich él gnü sotrissé che al é sté na dërta tempesta de plöia y vënt cina a 120 km/h ince jöinsom les valades; tan n gran vënt co che an ne l’â mai odü tl Südtirol, y porchël él tomé jö tröpes rames che á gaujé dagns ciamó da valuté. Tratan i laurs de nöt él mort le stödafüch volontar Giovanni Costa, che ê en sorvisc da passa 30 agn tla compagnia da Lungiarü dl Comun da San Martin de Tor. Te chël momënt ê ince le möt en sorvisc, ince ël stödafüch volontar. I assessurs Schuler y Mussner á recordé Alexander Mayr, le comandant di stödafüch de Atzwang, mort ince ël tratan n intervënt ai 31 d'agost dl 2014 "y düc i stödafüch volontars che se mët al prigo por la popolaziun". Dal 1960 él mort 17 stödafüch volontars tratan i intervënc de socurs.
I alarms, les previjiuns y les mosöres preventives tutes dala Proteziun zivila ti ultimi dis á fat a na moda che ara jiss da ti ester al'ona de bur tëmp. "I investimënc fac cun les mosöres preventives á dé de bugn resultac. La situaziun é romagnüda sot control" á sotrissé Schuler che á ince ël orü rengrazié düc chi che á dé so contribut te chisc dis. Al é ince gnü sotrissé le bun laur de coordinamënt fat dala Zentrala dla proteziun zivila y la colaboraziun cun le Comissariat dl govern.
L’assessur por les strades Florian Mussner á rengazié i 450 operadus dl sorvisc strades y i 25 tecnics che á fat na seria de intervënc. “Degügn de nos ne se recorda ones de vënt tan stersces, al se trata de n evënt epocal. I laurs por rové ala normalité á bele scomencé.” Ince le diretur dla Proteziun zivila Rudolf Pollinger á orü recordé le volontar di stödafüch mort ti fajon ince les condolianzes da pert de döta la Proteziun zivila ala familia.
I maiú dagns é gnüs a se le dé pro i rüs dla Gran Ega y le Derjon (Rü de Gherdëna). Por ci che reverda la Gran Ega n’êl ti ultims 100 agn nia sté na te situaziun. De mëndres conseguënzes án costaté pro i rüs dl Isarch y dla Riënza. Presc degun dann é gnü registré pro l’Adesc. “Ti ultims dis él sté en sorvisc indöt 4.000 stödafüch volontars te 152 staziuns. Chësc é n momënt dër dala ria, deache i un pordü n compagn.”
Le diretur dla Repartiziun Bosć, Mario Broll, á sotligné che “avëi albü na gran sconanza di bosć á porté a conseguënzes positives”. I bosć á insciö ciucé sö indöt 150 miliuns de metri cubics de plöia. Indöt él sté en sorvisc 102 colaboradus dla forestala tratan döta la nöt, 155 colaboradus ê a desposiziun y 97 operadus dla forestala á colaboré cun i stödafüch.
Fotografies pó gní desciariades sot a chësc Link;
Imajes video da desciarié:
Intervista presidënt di Stödafüch Gapp
Imajes audio
USP
