Atualità
Bur tëmp, la situaziun miorëia – conferënza stampa dales 11
Tröc inzidënc porvia dl bur tëmp. N stödafüch mör tratan n intervënt de prescia tla Val Badia. La situaziun dl tëmp miorëia
Tratan la nöt él i rüs de döt le Südtirol che á porté na gran cuantité d’ega che é jüda zoruch tratan les prömes ores da doman, ajache al á lascé da plovëi tan dassënn. Baldi él gnü a se le dé de plü inzidënc che á ince atoché porsones. Le plü gran inzidënt é gnü a se le dé tl Comun de San Martin de Tor, olache n volontar di Stödafüch é mort la vita tratan n intervënt de socurs. A Mühlbach é n volontar di stödafüch gnü ferí da n lëgn che é tomé jö y a Schlanders él sté n’ëra che é gnüda ferida da na pera che é tomada sön so auto. Tramidui á ferides de entité mesana-alta.
Tratan le danmisdé é la situaziun meteo miorada; les gran eghes di rüsc a Tlüses y Vandoies é gnüdes a se le dé n’ora dan les previjiuns dles calcolaziuns de referimënt. Ince tl raiun dl Unterland é l’ega alta dl rü stada plü abonora co preodü incër les cater, mo les proteziuns metüdes sö aposta á tigní y al é ma jü porsura pücia ega. En general é la situaziun che vá derevers ala normalité, n valgönes situaziuns resta ciamó critiches, mo ares vá tl vers de na contlujiun. Porvia di vënc stersc él gnü a se le dé de plü interziuns dl’energia eletrica por la tomada de fostüs sön les linies. Te n valgönes localités a chësc ince porté al’interziun dla linia dl telefon. Te chisc caji é i zitadins che pó contaté diretamënter i Stödafüch söl post che pó pité tres les trascmisciuns radio da fá telefonades de emergënza.
Dër alt é sté ince le numer dles forzes che á daidé para, tl momënt de majera ativité él indöt 2745 unités atives, tratan la nöt indöt 2100. De chëstes él sté 1950 unités de stödafüch, 75 operadus dla Crusc Blancia, 450 colaboradus dl Sorvisc Strades, 47 dla forestala y 8 tecnics dles operes idrauliches.
Tl zënter dla Proteziun zivila a Balsan él gnü monitoré tresfora la situaziun da 36 tecnics y funzionars. Plü de 200 mesi di stödafüch é gnüs adorá. Te chisc caji é ince fondamental le rode dla Zentrala por l’ega alta che á controlé i rüs cun 30 tecnics.
Tratan l’emergënza él gnü ativé ince les 9 zentrales operatives dl raiuns (COD) di stödafüch volontars y la Zentrala operativa provinziala di VVF volontars. Implü él ince rové ite 250 telefonades al numer vërt istituí aposta por chësta emergënza dal’Agenzia por la Proteziun zivila. Le 36 porcënt dles telefonades é gnü fat por ciafé informaziuns sön la situaziun dles strades y dl sorvisc publich, le 9,5 porcënt di zitadins á damané do informaziuns por la mancianza de enegria eletrica y le 41,5 porcënt á damané do informaziuns sön la probabilité de ega alta di rüsc.
La situaziun atuala tla Val de Puster é chëra che al é ciamó problems por la stüta de tröpes strades y dla linia dla ferata danter Sanciana y Lienz. I stödafüch é ince tl laur da pumpé fora ega dales cianoes a Sanciana. La strada statala dl Prener romagn stlüta, l’autostrada é daverta, les ferates zircolëia ince sön döta la trata dl Prener. A Tlüses él na smöia che á porté ala stlüta dla SS12 dlungia la nodadoia. La Zentrala provinziala d’Emergënza á ciafé indöt 1250 telefonades te 30 ores, i intervënc di stödafüch é stá dötadöm 536, 352 é stá i intervënc de socurs y 11 i intervënc de socurs alpin.
Dales 10 él preodü na reuniun de coordinamënt y spo gnarál fat na conferënza stampa che sará
dales 11.00
Incö mertesc, ai 30 de otober,
tl salf dla Proteziun Zivila
strada Druso 116
a Balsan.
USP
