Atualità
Migraziun: zifres y dac dl 2017
Tl 2017 êl 48.018 porsones da foradecá residëntes tl Südtirol. Paridlan cun l’ann da denant él n aumënt dl 2,6 porcënt sön na cuota dl 9,1 porcënt.
Sura döt le monn vëgn öna na porsona sön 20 conscidrada n migrant/na migranta. Chësc dat é gnü comuniché tl Dossier statistich sön la migraziun 2018 presenté incö a Balsan. Le dossier vëgn scrit vigni ann dal Zënter stüdi y inrescides IDOS sön inciaria dl Ofize nazional cuntra les discriminaziuns raziales. L’ediziun atuala é gnüda presentada da Matthias Oberbacher dl Osservatore por l’integraziun y da Federica Dalla Pria dla Fondaziun Alexander Langer. Indöt él gnü identifiché tl 2017 söporjö 258 miliuns de porsones sciöche migrantes, che fej fora le 3,4 porcënt dla popolaziun mondiala. Aladô dl ISTAT virel tla Talia indöt 5.144.000 zitadins da foradecá che fej fora le 8,5 porcënt dla popolaziun nazionala. Tl Südtirol é la cuota di zitadins da foradecá n pü’ plü alta y reverda le 9,1 porcënt che fej fora 48.018 porsones indöt.
Südtirol: migraziun en aumënt dai Paisc europeics
Tl Trentin é la cuota di migranc sön le numer complessif dla popolaziun le 8,7 porcënt, tl Tirol é la porcentuala dl 15,5 porcënt. Les porsones da foradecá residëntes tl Südtirol vëgn da 139 naziuns desfarëntes, partides sö danter i Paisc europeics (n terzo dl total), paisc europeics che ne fej nia pert dl’UE (n terzo) y dal rest dl monn (n terzo). I paisc da olache al vëgn de plü porsones da foradecá a vire tl Südtirol é l’Albania (11,1%), i Paisc Todësc (9,2%), le Maroco (7,0 %), le Pakistan (7,0%) y la Romania (6,6%). Le 70 porcënt di zitadins da foradecá che vir tl Südtirol vir da plü de 10 agn tla Talia. L’eté mesana di migranc residënc tl Südtirol é de 35,2 agn, la maiú pert é ëres (52,8 porcënt en confrunt ai 47,1 porcënt de ëi) y laora tl setur di sorvisc. Le davagn é mesamënter de söporjö 1.192 euro al mëis, le davagn mesan de n zitadin talian che vir tl Südtirol é indere mesamëntrer de 1.465 euro. La porcentuala plü alta de porsones da foradecá sön la popolaziun totala é gnüda registrada a Franzensfeste cun le 25,3 porcënt, spo Salurn (21,1 %), Pruca (18,1 %) y Prener (16,3 %). La maiú pert dla popolaziun che vëgn da foradecá vir a Balsan: indöt él 15.161 porsones che fej fora le 14,1 porcënt dla popolaziun dla cité. A Maran él indöt 6.570 porsones da foradecá che vir y chë fej fora indöt le 16,2 porcënt de döta la popolaziun.
Indöt vá 9.455 mituns de families de migranc a scora tl Südtirol. Al salta tl edl che plü alt che le livel formatif é y mënder che le numer di mituns foresti é. Sce la porcentuala di mituns foresti é dl 13,9% tles scolines (11,3% tles scolines todësces, 23,9% tles scolines talianes, 5,9% tles scolines ladines), s'arbassera cina al 12,3% tles scores elementares (8,8 % todësces, 24,8 % talianes, 5,9 % ladines), al 10,7% tles scores mesanes (7,1 % todësces, 22,7 % talianes, 4,6 % ladines) cina al 8,2% registré tles scores altes (4,5 % todësces, 17 % talianes, 2,5 % ladines).
Talia: stabii i migranc, arbassamënt di profugs
Al contrar de ci che an arata é le numer di foresti tla Talia romagnü stabil dal 2013 incá y plü avisa nen él 5 miliuns, deperpo che al crësc la porcentuala sön la soma totala porvia dl arbassamënt registré danter la popolaziun taliana che vëgn tres plü vedla. Dl 2017 â 5.144.000 zitadins foresti la residënza tla Talia, chël foss le 8,5% dla popolaziun nazionala.
De chisc vëgn 3,7 miliuns da Paisc nia dl’UE. Indöt él rové adalerch 119.310 porsones tla Talia sciöche profugs. Al é gnü registré n arbassamënt important che jará inant ince chësc ann. Dl 2016 êl 181.346 profugs, deperpo che dl 2017 nen êl 119.310. Le medemo ann danter jená y setëmber nen él cinamai "ma" 21.041. Dl 2017 n'â 15.779 profugs nia dejedot agn y n'ê nia acompagná: danter jená y messé dl 2018 nen él rové adalerch 2.896. Por ci che reverda la provegnënza di zitadins talians de origina foresta vëgn passa le 50% da paisc dl'Europa (de chisc le 30,4% da paisc dl'UE), dantadöt dala Romania (23,1%), dal’Albania (8,6 %) y dal Maroco (8,1 %). La porcentuala dla popolaziun de foresti é majera tla Lombardia (22,9%), spo tles regiuns Lazio (13,5%) y Emilia Romagna (10,6%). Ince tl Südtirol, sciöche tl rest dla Talia, é l’eté mesana dla popolaziun, metüda adöm dantadöt da ëres, danter i 30 y i 44 agn. De plü informaziuns y numeri sön l’imigraziun tl Südtirol y tla Talia ciafon tl Dossier statistich sön l'imigraziun 2018 che pó gní damané do sön la homepage dl editur, y ti file injuntá.
USP
Galaria dales fotografies
