Atualità

#velessüdtirol18: Resultat final provisore y spartiziun di mandac

Sëgn él danman n resultat final provisore y ince na pröma spartiziun di mandac do les lites provinziales 2018. Tl Consëi provinzial sarál 9 partis.

Le resultat provisore final dles lites dl Consëi provinzial nü é danman (Foto: USP/Ivo Corrà)

Les lites por renové le Consëi provinzial é jüdes a piz. Atira do la stlüta dles sëntes litales dales 21:00 él i 2.549 colaboradus litai tles 495 seziuns litales che á metü man da cumpedé fora les usc. Dales 05:00 él danman n pröm resultat final provisore cun ince la spartiziun di mandac tl Consëi provinzial. De conseguënza sarál tl Consëi provinzial nü indöt 9 partis, la fraziun plü grana sará sciöche preodü chëra dla "Südtiroler Volkspartei" cun le 41,9 porcënt cun 15 mandac provisori.

Al secundo post él rové cun na porzentuala de 15,2 % le parti “Team Köllensperger” cun 6 mandac che s’á presenté por le pröm iade ales lites provinziales. Davagné lapró á le parti “Lega Nord” che é rové al 11,1 porcënt y ciafará 4 mandac, i "Verdi – Grüne – Vërc" é rová al 6,8 porcënt (che comporta 3 mandac provisori). I “Freiheitlichen” á ciafé 6,3 % dles usc varëntes y ciafará 2 mandac, sciöche ince la “Südtiroler Freiheit” cun 6,0 % che passa da 3 a 2 aconsiadus provinziai. Un n rapresentant tl Consëi provinzial ciafa le parti “PD – Partito democratico Demokratische Partei” (3,8%), sciöche ince “Movimento Cinque Stelle” (2,4%) y “L’Alto Adige nel Cuore” (1,7%).

Degun mandat ne á ciafé alado dl resulta provisore i partis: Bürgerunion für Südtirol (1,3%), Noi per l'Alto Adige - Südtirol (1,2%), Forza Italia (1,0), Casapound Italia (0,9%) y Vereinte Linke - Sinistra Unita (0,6%)

Sön la plata internet lites.provinzia.bz.it pon consulté ince les usc por vigni singul candidat y ince les usc spartides sö söi raiuns teritoriai desvalies. Al á funzioné bun ince le Zënter stampa tl Palaz Widmann: i jornalisc y interessá á podü s'informé sön l'ajornamënt di resultac dles lites. 

USP

Galaria dales fotografies