Atualità
#velessüdtirol18: Dales 17.00 â lité le 50,5%
Dales 17.00 â dé jö süa usc le 50,5% dles 382.964 porsones cun le dërt da lité tl Südtirol.
Secundo ajornamënt por ci che reverda la partezipaziun ales lites: Dales 11.00 â lité le 19,7 % dles porsones cun le dërt da lité y sëgn dales 17.00 ê la porcentuala dl 50,5%. Dala daurida di locai litai incö dadoman dales 07.00 cina sëgn s'á anuzé 193.441 südtirolejes y südtirolesc de so dërt da lité ti 116 comuns. Dales lites dl Consëi provinzial dan da cin agn êl dales 17.00 jü a lité 210.842 zitadins, chël ó dí le 56,5%.
La majera partezipaziun ales lites é stada cina sëgn tl Comun de Mühlwald olache al á lité le 62,6% di litadus - dl 2013 ê da chëst'ora le Comun da Pruca chël cun la majera partezipaziun cun le 75%. La mëndra partezipaziun ales lites é gnüda segnalada dal Comun de Balsan cun le 43,5% - dan da cinch agn êl sté Pfatten cun le 43,6%.
Ti maius comuns ciarâra fora insciö dales 17.00 por ci che reverda la partezipaziun ales lites: A Balsan â dales 17.00 lité le 43,5 % (2013: 45,3%), a Maran le 42,9% (48,8%), a Porsenú le 51,7% (57,1%), a Bornech le 53,4% (61,9%) y a Leifers le 44,8% (43,7%). Pro i raiuns é chël cun la majera partezipaziun al momënt chël de Puster, la mëndra partezipaziun é gnüda segnalada tl raiun de Balsan.
Ti comuns ladins â lité cina les 17.00 le 50,3 % di litadus. Dan da cin agn êl sté le 57,2% che s’â anuzé de so dërt da lité cina les 17.00. La majera partezipaziun ti comuns ladins é stada cina les 17.00 tl Comun da La Val cun le 55,7% (dl 2013 60,6% ) y la mëndra tl Comun de Mareo cun le 47% (dl 2013 59,3 %).
Incö vëgnel por le pröm iade metü man atira do la stlüta di locai litai dales 21.00 da cumpedé fora les usc. I resultac dla cumpëda dles usc pó gní ciará do sön le portal web dles lites lites.provinzia.bz.it. Informaziuns atuales él da ciafé ince sön i canai di social media dla Provinzia: sön Facebook y sön Twitter, olache al pó ester d'öga le hashtag #velessüdtirol18.
Le Zënter di media tl Palaz provinzial 1 a Balsan é incö döt le de davert cina indoman por i media acreditá.
USP
Galaria dales fotografies
