Atualità

#velessüdtirol18: Le 73,9% á lité

Dales 21.00 canche al é gnü stlüt i locai litai â lité le 73,9% dles 382.964 porsones cun le dërt da lité tl Südtirol.

I locai dles lites (tla fotografia Balsan) tles 495 seziuns litales é gnüs stlüc dales 21.00; atira dedô án metü man da cumpedé fora les usc. Foto: USP/Ivo Corrà

I locai litai tles 487 seziuns litales é gnüs stlüc dales 21.00. Sëgn pól gní trat le bilanz por ci che reverda la partezipaziun ales lites. Al é gnü lité 35 aconsiadus y aconsidësses tl Consëi provinzial. Cun la partezipaziun ales lites da incö vá le trend inant jöpert por ci che reverda la partezipaziun. Sce dl 1998 êl ciamó jü a lité le 85,7% cun le dërt da lité, nen êl dl 2003 ma plü jü a lité le 82,4% y dl 2008 l’80,1%. Dl 2013 ê la partezipaziun ales lites jöda sot l’80% cun le 77,7%.

Tles 14 ores dala daurida di locai litai incö dadoman dales 7.00 s'á 282.920 südtirolejes y südtirolesc cun le dërt da lité anuzé de so dërt da dé jö süa usc ti 116 comuns, chël é le 73,9%. Pro les lites dl Consëi provinzial dan da cin agn êl jü a lité cina ala stlüta da inlaota dales 22.00 le 77,7%. Pro la partezipaziun ales lites da incö vëgnel registré n arbassamënt dl 3,8%.

Tl Südtirol á 382.964 porsones le dërt da lité - dl 2013 podô 373.050 lité. Adöm cun chi che lita por posta röion sön 417.968 - dan da cinch agn êsi indöt 400.961. Cina dantier (ai 19 d'otober) da sëra â tut pert 10.442 litadus ala lita por posta.

La majera partezipaziun ales lites é stada tl Comun de Vöran olache al á lité le 86,5% di litadus - dl 2013 ê le Comun cun la majera partezipaziun sté Rodeneck cun le 91,1%. La mëndra partezipaziun ales lites é gnüda segnalada dal Comun de Maran cun le 62,1% - dan da cinch agn êl sté Balsan cun le 64,6%.

Ti maius comuns é la partezipaziun ales lites incö stada insciö: A Balsan é la partezipaziun stada dl 64,6% (2013: 64,6%), a Maran 62,1% (65,6%), a Porsenú 73,0% (76,7%), a Bornech 74,2% (79,2%) y a Leifers le 67,8% (65,4). Pro i raiuns é chël cun la majera partezipaziun chël de Salten-Scilier cun le 80,0%, la mëndra partezipaziun é stada tl raiun de Balsan.

Ti comuns ladins á lité cina les 21.00 le 75,4% di litadus. Dan da cin agn êl sté le 79,3% che s’â anuzé de so dërt da lité cina les 22.00. La majera partezipaziun ti comuns ladins é stada tl Comun da La Val cun l’84,1% (2013: 87,3% ) y la mëndra tl Comun de Corvara cun le 70,9% (2013: 74,9%).

Sëgn vëgnel por le pröm iade metü man atira do la stlüta di locai litai dales 21.00 da cumpedé fora les usc. I resultac dla cumpëda dles usc pó gní ciará do tl tëmp real sön le portal web dles lites lites.provinzia.bz.it. Informaziuns atuales él da ciafé ince sön i canai di social media dla Provinzia: sön Facebook y sön Twitter, olache al pó ester d'öga le hashtag #velessüdtirol18

Le Zënter di media tl Palaz provinzial 1 a Balsan é incö döt le de davert cina indoman por i media acreditá.

USP

Galaria dales fotografies