Atualità
San Linert: Rü de Ciadinat en segurëza
L'Ofize Sistemaziun di rüs da munt y paralovines ost dl'Agenzia por la Proteziun zivila á sltüt jö i laurs sön le Rü de Ciadinat a San Linert.
Tl cheder de n pröm lot de laurs él gnü metü man l'ann passé da antergní por mëte en segurëza l’andamënt mesan dl Rü de Ciadinat cuntra la munt a San Linert; al é gnü stabilisé le let dl rü tres tlüses de lëgn y ciostuns. D'aisciöda do che la gran nëi s'â deleghé tan debota êl tomé jö dal raiun instabil cuntra Sas dla Crusc tröp material che â gaujé l’oclujiun dl let dl rü te de plü punc y desdrüt val' passaji. Les operes realisades cun n pröm lot l'ann passé d'isté n'é nia gnüdes danejades mo al jô debojëgn da tó y jí le material detritich danter les operes y söinsom l’area metüda a post.
L'intervënt preventif
"Porvia dla cuantité de material da sposté dala pert instabila de Sas dla Crusc él gnü realisé ince n ampliamënt dl let dl rü söinsom la stiga de tlüses, por sostigní la deponüda dl material denanche al podess jí tl let dl rü" spliga la direturia di laurs Caterina Ghiraldo, vize direturia dl Ofize Sistemaziun di rüs da munt y paralovines ost dl'Agenzia por la Proteziun zivila. Por l’intervënt él sté gnü investí 150.000 euro. Dla realisaziun dl intervënt s’á cruzié Heinz Baumgarten y sü lauranti. I laurs sön le Rü de Ciadinat jará inant ti proscimi agn cun les operes de stabilisaziun tla pert dessot cina ala confluënza cun la Gran Ega.
USP
