Atualità

Motors ite en Antersasc, al é proibí da zircolé tles arees sconades

Jí cun le motor tla Val de Antersasc ne é nia conzedü, recorda i carabiniers y la forestala. N grup de porsones cun le motor á ciafé straufunghes inier.

N grup de porsones á ciafé straufunghes inier ai 4 de otober tla Val de Antersasc tles vijinanzes de Crëp dales Dodesc tratan che ai fajô motocross. Insciö él la forestala y i carabiniers che é intergnüs porvia che al ne ê nia gnü respeté la proibiziun dla zircolaziun te zones sot a sconanza y por le drumblamënt fat. Le diretur dl Ispetorat dla forestala da Bornech, Silvester Regele, comunichëia l’intervënt dla forestala adöm cun i carabiniers dla val Badia. “Ince sce al é proibí vëgnel gonot a se le dé che porsones fej motocross ti bosć y sö por munt. Cun le motor ne vëgnel nia ma gaujé incuinamënt acustich y dl’aria, mo jí cun le motor sö por munt é ince n desturb por i tiers y por les porsones che vá a pe”, spliga Regele. La proibiziun da passé cun veicui a motor nia autorisá é preodüda dala desposiziun sön la zircolaziun te teritori sot a sconanza idrogeologica y dl paesaje (lege provinziala 10/1990).

Por la contravenziun vëgnel apliché na straufunga aministrativa de 200 euro canche les violaziuns vëgn fates te zones corografiches, parcs y resserves naturales, biotops y monumënc naturai sconá. Ti parcs naturai vëgn l’import aumenté dl 50 porcënt. Le passaje vëgn ma conzedü sce le proprietar dl terac dá süa aprovaziun scrita y sce ince la forestala dá l’aprovaziun. Sce i autisć proa da s’un sciampé dai controi, sce ai se comporta te na manira prigorosa che podess mëte tl prigo les porsones o sce i motors ne n’á degöna targa o na targa nia aprovada él preodü le secuester dl veicul.

 

 

USP