Atualità

Strada nöia por la Val d’Ega: Balsan y Fascia plü daimpró

Cun la cuntlujiun dl terzo lot dla modernisaziun dla strada tla Val d’Ega vëgnel ince a se le dé vantaji por i abitanc dla Val de Fascia.

Strada nöia por la Val d'Ega: n'opera stradala de importanza fondamentala por döta la valada (Foto:USP/Repartiziun Infrastrotöres)

Da Balsan tres la Val d’Ega cina te Fascia. La strada che porta tla Val d’Ega é ince n percurs de coliamënt important danter le Trentin y le Südtirol y ince na trata direta por i ladins dla Val de Fascia che ó arjunje Balsan. Cun la contlujiun di laurs de modernisaziun dla strada él gnü porté a piz insciö un di proiec plü importanc por ci che reverda l’infrastrotöra stradala di ultims agn. Indöt él gnü spartí sö i laurs te trëi loc. I laurs por le pröm y le secundo lot é bele gnüs portá a piz y sëgn él ince gnü stlüt jö i laurs por la pert finala. Por ci che reverda le pröm y le secundo lot él gnü costruí i trëi tunì “Karneid”, “Kampenn” y “Tschungg” y dui punc. Al röia lapró les operes stradales dl terzo lot che é dui tuní lunc indöt 600 metri y dui punc da 24 y 25 metri. La trata dl terzo lot é de indöt 840 metri.

Gran importanza ti él gnü dé tratan la proietaziun y costruziun dla strada nöia al inserimënt architetonich dles operes tla contrada. Indöt passél zirca 2.900 veicui por direziun y porchël él gnü istalé n implant de ventilaziun automatich colié danter les galaries.  Le presidënt dla Provinzia á dit che “cun chësc coliamënt stradal nü sarál plü saurí por i pendolars, i scolars y les scolares, mo ince por düc i lauranc y daturs de laur da arjunje la Val d’Ega”. Ince por l’assessur competënt por les  strades é la realisaziun dla strada nöia “na noela dër positiva, deache al se trata de n proiet dër compliché che nüsc tecnics y les firmes de costruziun á porté a piz te na manira ejemplara”. Les impreses che á lauré para é stades A.T.I., PAC S.p.A., GergorBau S.r.l., Goller Bögl S.r.l., Gasser S.r.l. y S.I.E.I. S.r.l. Le cost complessif dl intervënt é de 17,5 miliuns de euro. La daurida por le trafich é stada incö sabeda dales 11:30 danmisdé.

USP

Galaria dales fotografies