Atualità

Fascicul sanitar eletronich pian ia dala fin d'otober

Le Fascicul sanitar eletronich ti dará a vigni zitadin y zitadina la poscibilité da ti ciaré online a sü dac sanitars y ales maraties albüdes. Ok dala Junta.

La junta provinziala á aprové incö (ai 18 de setëmber) sön proposta dl'assessuria provinziala por la sanité l'introduziun dl fascicul sanitar eletronich tl Südtirol ai 31 d'otober

Dai 31 d'otober dl 2018 inant dess düc i zitadins y dötes les zitadines dl Südtirol che á cumplí 18 agn y é scric ite tl sorvisc sanitar provinzial, podëi ti rové pormez online a so fascicul sanitar eletronich y ti ciaré iló a sü dac sanitars y ales maraties albüdes. L'azes vëgn a se le dé tres la cherta di sorvisc ativada o tres l'identité digitala SPID y chësc indlunch y tres. Bele da mez otober dl 2018 inant gnará dötes les prescriziuns digitales ortiades al fascicul sanitar. I resultac dles proes fates dess gní metüdes a desposiziun cina la fin de novëmber tl Fascicul sanitar eletronich. L'Aziënda sanitara é tl laur da arjigné ca les condiziuns che vá debojëgn. Al momënt él ma laite i dac de assistënza.

La junta provinziala á aprové incö (ai 18 de setëmber) sön proposta dl'assessuria provinziala por la sanité l'introduziun dl fascicul sanitar eletronich tl Südtirol ai 31 d'otober. Chësc sozed sön la basa dl „Plann de proietaziun por la realisaziun dl Fascicul sanitar eletronich tl Südtirol“, che ti ê gnü porté dant dala Provinzia al Ministere por la sanité a Roma l'ann passé. Al contëgn les mosöres da realisé dal'aministarziun provinziala y dal'Aziënda sanitara Sabes y i tëmps te chi che al dess sozede. Al vëgn scrit dant n control di progresc di laurs tres l'autorité statala. L'introduziun dl FSE vá zoruch a na dezijiun dla conferënza Stat-Regiuns dl 2011. Les diretives sön l'introduziun dl fascicul digital ê gnüdes dades dant dan da n ann dal Ministere por la sanité. A livel tecnich él gnü amplié en colaboraziun cun la Südtiroler Informatik AG la plataforma che ê bele „SIS-FSE-ePRE“ y ativada sciöche infrastrotöra „SIS-FSE“.

Dal'introduziun dl FSE s'aspeta la junta provinziala vantaji por l'assistënza sanitara. „Tan inant che les paziëntes y i paziënc dá so consëns pó les doturies y i doturs che se crüzia de ëi ti ciaré al fascicul; chësc podess cinamai salvé vites te caji de gran emergënza“, dij la junta provinziala. I dac pó daidé tó dezijiuns cliniches, mioré la planificaziun y aministraziun dla sanité y ester a desposiziun por la sciënza y l'inrescida.

 

USP

Galaria dales fotografies