Atualità

Ospedal da Bornech, 20 miliuns de euro por l’ampliamënt

La Junta á preodü 19,7 miliuns de euro implü por la restrotoraziun y l’ampliamënt dl ospedal da Bornech. Dötadöm é la soma de prësc 160 miliuns de euro.

Tratan süa sentada de ai 11 de setëmber á la Junta provinziala aprové le program planivolumetrich ajorné por la restrotoraziun y l’ampliamënt dl ospedal da Bornech che prevëiga n investimënt de 19,731 miliuns de euro. La delibera prevëiga l’ampliamënt dl program planivolumetrich da denant aprové tl 2009 cun n investimënt complessif de 140 miliuns de euro. Ti ultims 10 agn él gnü fat laurs y investimënc por indöt 64 miliuns de euro, la soma che resta é insciö ciamó de 76 miliuns de euro che ne basta indere nia plü porvia de cosć ajuntifs por ci che reverda variaziuns ti seturs tecnich, iuridich y sanitar.

La Junta provinziala á insciö messü aumenté la soma preodüda cun indöt 19,73 miliuns de euro che röia lapró. Cun chëstes ressurses gnarál realisé le zënter provinzial por la fecondaziun assistida, la reumatologia, l’ampliamënt dla ciasadafüch, dla pediatria, dl sorvisc de dietologia. Implü gnarál ince investí tl spostamënt y tla reorganisaziun de n valgügn sorvisc al intern dl ospedal, sciöche por ejëmpl i lec tl repart de internistica y l’adatamënt de cosć preodüs dan da 9 agn ai cosć standard atuai.

 

USP