Atualità
Dala Junta: Integraziun, investimënc, IDM y NOI
De plü é stades les dezijiuns tutes dala Junta provinziala te süa sentada incö ai 11 de setëmber ti seturs dla integraziun, mobilité, turism y inovaziun.
Do na seria de aprofondimënc iuridics á la Junta provinziala tut la dezijiun incö ai 11 de setëmber che dal 2019 inant gnará les prestaziuns soziales suplementares ma plü garantides a zitadins foresć da Paisc terzi aladô dl prinzip dl’integraziun coliada al impëgn.
Dal 2019 inant gnará les prestaziuns soziales che vá surafora de chëres essenziales ma plü paiades fora/garantides dala Provinzia de Balsan ai zitadins foresć aladô dl prinzip dl’integraziun coliada al impëgn, dantadöt por ci che reverda l’aprendimënt linguistich. Chësta é stada la dezijiun dla Junta provinziala sön la basa de na seria de aprofondimënc dal punt de odüda iuridich. L’analisa iuridica plü atuala é chëra dl professur Walter Obwexer dl’Université de Desproch, aladô de chëra che les desposiziuns dla lege provinziala söl’integraziun dl 2011 che prevëiga la facolté de colié l’erogaziun de prestaziuns soziales ajuntives por i zitadins de Paisc terzi ala conoscënza di lingac todësch y talian é varëntes ince aladô dl dërt comunitar y internazional. La Junta á deliberé che les prestaziuns sará paiades fora/garantides tl respet di prinzips dla proporzionalité y dla confromité colian a trëi condiziuns: la conescënza di lingac talian o todësch, la frecuentaziun de n curs d’integraziun y l’ademplimënt al’oblianza scolastica. Chëstes condiziuns sará nezesciares por ciafé prestaziuns soziales che vá surafora de chëres essenziales dal 2019 inant por düc i zitadins che ne é nia dl’Uniun europeica. Ti proscims mëisc messará spo les repartiziuns competëntes mudé i critérs de finanziamënt y lauré fora les prozedöres nezesciares.
Implü á la Junta provinziala ince aprové la sotesciziun de döes acordanzes cun le Minister di trasporc y dles infrastrotöres che reverda la conzesciun de contribuc statai de prësc 4,7 miliuns de euro por la cumpra de na ferata por la linia dla Val Venosta y 5 corieres eletriches nöies por le trasport dl SASA. La basa iuridica dles acordanzes é le fonds de svilup y coejiun 2014-2020 che prevëiga la partezipaziun ala spëisa finanziara pro investimënc sides te ferates y corieres nöies. Indöt él preodü 7 ferates nöies por la linia dla Venosta da 270 posć vignun (investimënt preodü de 9 miliuns de euro) y 5 corieres eletriches nöies (investimënt preodü de 3,63 miliuns de euro). Aladô dles convenziuns sará la partezipaziun finanziara dl Minister de 3,7 miliuns de euro pro la cumpra de na ferata nöia y de 924.000 euro pro la cumpra dles corieres eletriches.
La Junta provinziala á ince aprové incö ai 11 de setëmber l’acordanza cheder danter la Provinzia y la Ciamena de Comerz por ci che reverda la spartiziun nöia di compic dla sozieté IDM y la spartiziun dles competënzes che reverde le NOI Techpark te na sozieté nöia che ará le inom de NOI Spa. AL se trata de provedimënc nezesciars por concretisé la reorganisaziun dla IDM. En vëndres él preodü l’aprovaziun ince da pert dla Ciamena de Comerz. NOI Spa pitará na consulënza strategica ales impreses y en particolar ales startup.
Na tematica tratada dala Junta provinziala incö é ince stada l’aprovaziun de 750.000 euro por trëi agn ala sozieté IDM por realisé dui pecursc danter l’Ortles y la Val Martel tl Parch nazional dl Stelvio. Les ressurses dess gní investides por revaluté döta la zona y i comuns dl Parch nazional dl Stelvio.
USP
