Atualità
Südtirol Pass abo+, renovamënc cina ai 15 de setëmber
Renovamënt cina ai 15 de setëmber por scolars y studënc che ó adoré so Südtirol Pass abo+. Döt digital, ultim ann zënza SPID.
I 80mila scolars, lerneri o studënc che tol le Südtirol Pass abo+ por jí cun i mesi dl trasport publich local tla provinzia de Balsan, pó renové süa tessera cina ai 15 de setëmber y l’adoré ince l’ann de scora 2018-2019. Sciöche denant mëss döta la prozedöra de renovamënt gní fata online sön le portal www.mobilitaaltoadige.info, mo al sará l'ultimo iade che al ne vëgn nia damané le SPID (sistem publich d’identité digitala) o la Cherta di sorvisc ativada, che sará dal proscimo ann inant obligatore. Por le renovamënt bastel mëte ite tl raiun personal www.mobilitaaltoadige.info i dac anagrafics, le codesc fiscal, le numer d’abonamënt y la scora fata.
Ince le contribut anual, danter 20 y 150 euro, pó gní paié online tres cherta de credit y home banking, o te n secundo momënt tres le cunt utënt online o les portines autorisades, presentan la tessera. Por la pröma emisciun mësson dé jö te 15 dis na copia eletronica dla cherta d'identité dla porsona che fej domanda; an pó la ciarié sö tres le cunt utënt online o la ortié ala misciun de posta eletronica dada dant tla mail che an ciafa do che an á fat domanda. Ara vá ince da fá na foto da lí dla cherta d'identité, por ejëmpl cun le fonin. Por scolares y scolars de mëndra eté mëss la domanda gní fata da n genitur. Les tesseres che é sëgn atives vel cina ai 15 de setëmber.
Info: www.mobilitaaltoadige.info
USP
