Atualità

Forum Alpbach, premiei i tuadëures jëuni Moroder y Schuler

Dis dl Tirol dl Forum Alpbach: pesć per i tuadëures y inuvadëures jëuni dla Euregio.

Foto de grupa di premiei Foto Land Tirol/Sedlak

N pest de prestisc ti ie unì cunferì inier, ai 19 d’ agost, n l Di dl Tirol al Forum Alpach al  mprendidëur y nventëur jëun Moritz Moroder de Urtijëi. Moroder à giapà l pest per avëi svilupà adum a si fra Matthias Moroder n “multijoler” cumandà a destanza, de 160 chili plu lesier n cunfront a n joler normal. L possa unì adurvà per fé puenc tl air cun raions ijulei y desman tl cajo de operazions de prutezion zevila o per recunizions geologiches. Al segondo y terzo post se à tlassificà Chiara Morstabilini y Nadia Zorzi dl Maccaferri Innovation Center de Bulsan per avëi svilupà respetivamënter n njin inuvatif per cuntrasté la fazions danejëntes dla jetedes de detric y na plataforma web acun azes liede per l sustëni dla proietazion y dla valutazion de infrastrutures vërdes tl raion di ruves tl Südtirol.

Hannes Schuler ie l “tuadëur jëun dl’Euregio” 2018. Si lëur, che l à purtà inant tl Zënter de nrescida de Laimburg, ie dedicà ala fazions sun l ecosistem che se porta pro dai mustlons da versura nueves. La giuria cun a cë la presidënta dla Unibz, Ulrike Tappeiner, ti à assenià l Pest tuadëures jëuni dla Euregio, sëurandat n ucajion dla giaurida dl Forum de Alpbach. L segondo pest ti ie jit a Adrian Lindermuth (Università de Dispruch) per l stude dla capazità de cuntenimënt dl liet dl ruf Inn tl Tirol, ntan che l terzo pest ie unì sëurandat a Karolina Sakowska, for dla Università de Dispruch, per na nrescida sun la fazions positives che la plantes linëuses pudëssa povester avëi sun l smendrimënt dla fazion sera. Recunescimënc à nce giapà Lorenzo Tonina (Università de Padova), Jessica Balest (Eurac Research) y Thomas Niederkofler (Unibz). La scumenciadiva transfruntaliera che ie ruveda a si setima edizion vën sustenida dala Cameres de Cumerz la Euregio cun trëi pesć da 2.000, 1.000  y  500 euro ala trëi miëura nrescides.

Link video

La premiazion

USP

Galaria dales fotografies